Hualien, ïaïong:
Ka Central News Agency Focus Taiwan ha ka Sngi Ba-ar ka la iathuh ba ka Taiwan kaba dei ka ri dewlynnong ka la sakhi haduh san tylli ki sien khynñiuh jumai tang hapoh 9 minit. Ki ar tylli ki thaiñ kiba kham shah ktah bha ha utei u jumai ki kynthup ia ka Shoufeng bad ka Hualien kiba don sha ka thaiñ Mihngi jong ka Taiwan.
U jumai uba nyng-kong u la sdang ban khynñiuh naduh ka por 5:08 bad kumta ter-ter uwei hadien uwei haduh ka por 5:17 jong katei ka miet.
Ha ki ar taiew ba la leit, u jumai-bah uba khlaiñ bor bha u la pynkhynñiuh ia ka thaiñ Mihngi jong ka Taiwan, ha kaba 4 ngut ki la khlad bad kumba 700 tam pat kiba la mynsaw na utei u jumai ha katei ka por.
Hynrei napdeng kitei ki 5 sien khynñiuh jumai ha katei ka miet Sngi Nyngkong, ka tnat US Geological Survey (USGS) ka la pyntip ba u jumai uba kham khlaiñ duh na kitei ki 5 sien khynñiuh u dei uba la kot ia ka jingkhlaiñ kaba 6.5 Magnitude hynrei ka long kaba donbok ba ym shym la ïohsngew ia ki khubor ba sngewsih na utei u jumai ha katei ka miet.
Shuh shuh ruh la ong ba utei u jumai uba la leit pynkhynñiuh ia ka nongbah Hualien ha ka 3 tarik u Iaiong, ka la shim ia ka jingim jong 4 ngut ki briew bad pyn mynsaw ruh ia palat 700 ngut ki paid nongshong shnong jong katei ka nongbah.
