Shillong, Ïaïong 23
U MLA ka Voice of the People Party (VPP) na North-Shillong, Bah Adelbert Nongrum u la ong ba ka Sorkar ka dei ban shim ïa ka jingkitkhlieh lada mih kano-kano ka jingjia kaba heh namar ka jingpynslem ban pynkynriah ïa ki nongshong shnong kiba shong ba sah ha Them Ïew Mawlong.
“Na i jingjia i barit, ka lah ban jia ha kano-kano ka por kaba heh…mano ban shim pat ka jingkitkhlieh, ka Sorkar kan hap shim ka jingkitkhlieh lada ka pynslem ban pynkynriah noh mardor ïa ki nongshong shnong kiba dei ki nongshong wai na Them Ïew Mawlong,” la ong u Bah Nongrum haba kynthoh halor ka jingjia kaba la jia ha ka miet Sngi Saitjaiñ ha Ïewduh.
Haba kdew ba kum u MLA u hap ban tuklar naba ka Them Ïew Mawlong ka hap hapoh konstitwensi jong u, u la ong ba um lah ban shu peit ne sngap ïa ka jingjia kaba la jia ha ka miet Sngi Saitjaiñ, ha kawei ka jaka bam kaba kyrteng ka Saw Aïom ha kaba ki nongshong shnong kiba dei ki nongshong wai ha Them Ïew Mawlong, ki thmu pynmih jingkulmar kaba lehse kaba lah ban pynmih biang ka jingïakynad kumba la jia ha u snem 2018.
“Kine ki nongshong shnong kumba ka paw ha ki rynsan lad pathai – ka jingthmu jong ki ka dei ban dih ei, ban bam ei na katei ka jaka bam bad ki thmu ban pyni bor bad leh donbor ha kane ka Jylla jong ngi, ha ka jaka jong ngi, kaba ngim lah ban shah,” la ong u Bah Nongrum.
Haba ai khublei ïa ka tnat pulit kaba la lah ban ban tem ïa katei ka jingjia, u MLA u la kyntu ïa ka tnat ban pynneh-pynsah ïa ka shong suk shong shngaiñ, ha kajuh ka por, ka dei ban pyntikna ba ka aiñ ka ïa ryngkat lang kumjuh ïa baroh bad ym ban leh shiliang khmat tang ïa kawei ka jaidbynriew.
Kumjuh, haba kynthoh ïa ka Sorkar halor katei ka mat, utei u nongmihkhmat u la ong, “Nga kwah ban phah ka khubor kaba shai sha ka Sorkar MDA-II, kajuh MDA-I…san snem phi la khmih ïa kane ka mat, phim shym la lah bad phi la pulom ha baroh ki liang. Kane ka pynpaw ïa ka jingbym shimkhia, ka jingbym kitkhlieh jong kita kiba kam nongïalam. Kaba sngewsih ka long ba la pynsahteng ïa kane ka kam ban pynkynriah ïa ki nongshong wai na katei ka jaka.”
Shuh shuh u la dawa ba ka Sorkar ka dei ban pynkynriah noh mardor ïa ki nongshong shnong na katei ka jaka bad ym ban shu kular tang ka ktien na kawei ka snem sha kawei pat.
“Mynta la palat san snem, ka long ka jinglehraiñ kaba khraw bad ka pyni ïa ka jingbym larkam jong ka Sorkar ha kaba wat ka ïingbishar ka Jylla ruh ka hap ban tuklar. Ka pyni ba ka Sorkar ba ïalam da ka NPP ka dei ka Sorkar kaba tlot – ka don ka Sorkar hynrei kam don ka jingsynshar,” u la ong.
Nalor kane, u la ong ruh ba ka jingbuh ïa ka jingker nar ha katei ka jaka ban khang ïa ka ïaid ka ïeng ki kali ka la wanrah pynban ïa ka jingdheng kali kaba shyrkhei ha katei ka jaka.
