Hyderabad, ïaïong:
U District Electoral Officer (DEO) jong ka Hyderabad, u la buh ka jingmudui pyrshah ïa ki 30 ngut ki nongtrei sorkar, kiba kynthup ïa ki nonghikai, ki Professor bad ki nongtrei jong ka Commercial Taxes Department, namar ka jingbym leit ïashim bynta ha ki klas ai jinghikai pyntbit shwa ban pynlong ïa ka ilekshon LS.
‘U District Electoral Officer, u Ronald Rose, u la pyntreikam pyrkhing na ka bynta ki nongtrei kiba la ïaid lait na ka jingwan shah hikai bad ong ba u la pynngat pyrshah ïa ki hapoh ka kyndon 134 jong ka RP Act 1951.
Ha ki khyndiat sngi ba la leit, ki heh ba dei khmih jong ka District Election ha Hyderabad kumjuh ki la pynngat hapoh ka kyndon aiñ pyrshah ïa ki 10 ngut ki nongtrei namar ba kim shym leit shah hikai pyntbit. Khlem kino kino ki daw kiba biang kine ki nongtrei ki la pep na ka bynta ka jingshah hikai, la ong u Ronald Rose.
