Bengaluru, ïaïong:
U Myntri Rangbah jong ka Karnataka u Siddaramaiah u la pynpaw ka jingsngewnguh ïa ka Supreme Court hadien ba lyngba ka jingai hukum jong ka, ka sorkar kmie ka la kular ban pynkloi ha ka ban ai jingkyrshan pisa sha ka jylla kaba la buh jingdawa halor ki jingeh ba ïakynduh na ka jingrang tyrkong, bad ong ba kane ka la long ka jingsngew sting hadien ka jingïai ap slem halor ka jingkyrpad na ka bynta ban ïakhun ha ka ban pynïoh ïa jingïarap halor kane ka jingdawa.
Ha ka kyrwoh khubor ha ka X, u Siddaramaiah u la ong, “Kane ka dei ka jingïaid lynti kaba la slem bad ka jingjop na ka bynta jong ngi ha ka jingïakhun kaba la slem ban pynïoh ïa ka hok bad ka jingïarap sha ki briew jong ka Karnataka.”
U la ong shuh shuh ba “kane ka sorkar ba mynta kaba la pynslem ban ai ïa ka jingkyrshan pisa mynta ka la mynjur da ka jingshim jingtuklar lem jong ka SC.”
“Ka long ka jingsngewnguh na ka bynta ka Supreme Court badonburom kaba la shim ka jingkitkhlieh ban tuklar halor kane, ka sorkar kmie, kaba la pynslem ha ka ban pynïoh ïa ki jingkyrshan pisa na ka bynta ki nongrep jong ka Karnataka, kaba la mynjur ban ai ïa ka jingïarap hapoh ka shi taïew,” la bynrap ka rynsan phah khubor.
Katkum ka jingmih jingthoh ha ka rynsan phah khubor la ong, “Ka Karnataka da ka jingbym banse ka la hap ban buh ka jingmudui pyrshah ïa ka sorkar kmie hapoh ka ïingbishar ban dawa na ka bynta ban pyllat ïa ka pisa ban ïarap halor ka jingrang tyrkhong, naba ka sorkar kmie kam shym la ai kano kano ka rai ha kaba ïadei bad ka dorkhas jong ngi, ïa kaba la phah ha u Nailur jong u snem 2023.”
Kham ha shwa kane, ka sorkar kmie ka la pyntip sha ka Supreme Court ha ka Lah Sngi U Blei ba kan sa weng noh ïa ki jingeh kiba long katkum ka mat ba ïadei bad ka jingkyrpad jong ka sorkar Karnataka ha kaba ïadei bad ka jingphah pyllait ïa ka pisa ban ai jingkyrshan halor ka jing-rang tyrkhong bad la kumno kumno la ong ba ïa kane ka jingïarap pisa yn sa pyllait ha ka 29 tarik, Ïaïong.
