Shillong, Ïaïong 23
Ka ABVP-Meghalaya ka pynrem jur halor ka jingshah thombor jong 2 ngut ki kynthei kiba hapoh 18 snem ka rta bad ki paralok jong ki ha South West Garo Hills bad dawa na ki bor ba dei khmih ban leh eiei mardor ïa kiba donkti ha katei ka kam.
“Ka seng ka pynpaw ka jingsngewsih kthang halor ka jingjia kaba la jia ha South West Garo Hills ha ka 17 tarik mynta u bnai, katba dang ïaid ka ‘Changa Benga’ Mela ha katei ka distrik,” la ong State Secretary ka ABVP-Meghalaya, u Tengku M. Marak ha ka kyrwoh khubor.
Ka seng ka la pynkynmaw ba 2 ngut ki kynthei kiba hapoh 18 snem ka rta ki la ngat ha kawei ka apot hadien ba ka kynhun ki runar ka bym ithuh satia ka la thombor ïa ki.
Nalor jong ki, sa 2 ngut ki khynnah shynrang kiba la synran lang ïa ki, ki la shah shoh ha ban da jem jai. Katei ka jingjia ka la jia ha ka por kumba 9:30 mynmiet katba kitei ki lanot ki la ïaid kham pajih na ka jaka ba pynlong ïa katei ka Mela.
Ka seng ka la ong ruh ba ki runar kiba kah dur da ki jaiñ ïong, ki la thombor kynsan-kynsan ïa ki, bad ha katei ka jingjia, ki khynnah shynrang kim shym la tip briew shuh shuwa ba katei ka kynhun kan thombor sa ïa ki kynthei.
“Ngi la ïoh jingtip ba kawei na kitei ki khynnah kaba hapoh 18 snem ka rta ka dei ka khynnah skul ha kawei ka shlem pule kaba ha South West Garo Hills. Katba kiwei pat ki la pynïasoh ïalade ha ki shlem ai jinghikai bapher-bapher,” la ong u Marak.
Ka ABVP-Meghalaya ka pynrem jur ïa katei ka jingjia bad dawa ïa ka hok na bynta ki lanot bad ki bahaïing hasem jong ki.
“Ngi kyntu ïa ka imlang-sahlang ban pynsawa ïa ka sur pyrshah ïa kiba kum kine ki jingleh ‘riewkhlaw bad ban ïatreilang ban khang lad ba kin jia biang hadien-habud,” u la ong.
Ka seng ka la ong ruh ba wat la katei ka jingjia ka la jan dap taïew, ka la don ka jingsngap jar na ka liang ka Sorkar.
Shuh shuh ka ABVP-Meghalaya ka kyntu jur ïa ki bor ba dei khmih ban leh eiei noh mardor pyrshah ïa kito kiba donkti ha katei ka kam, lyngba ka jingtohkit kaba bniah khnang ban pynïoh ïa ka hok.
“Ka seng ka ïeng tylli lang kawei bad ki lanot lem bad ki bahaïing ha sem jong ki, ban kyrshan na bynta ki hok jong ki, kumjuh ban dawa pynshitom ïa kito kiba donkti,” u la ong.
