Shillong, Ïaïong 23
Ki pulit ki la kem noh ïa 3 ngut ki samla na Assam halor ka jingkynnoh leh be-ijot ïa 2 ngut ki khynnah kynthei kiba dang hapoh 18 snem ka rta bad shoh ïa 2 ngut ki khynnah shynrang ha pynthor kba katba dang pynlong ïa ka Chenga Benga Mela ha South West Garo Hills ha ka 17 tarik mynta u bnai.
Ki pulit ha ka Sngi Ba-ar ki la pyntikna ïa ka jingshah kem ki 3 ngut na South Salmara distrik jong ka Assam bad ong ba katba ïa ki 2 ngut la kem na khappud Meghalaya ha ka Lah Sngi U Blei, bad uba 3 pat, la kem katba u dang pyrshang ban phet da ka bos ka ban leit sha Meghalaya na Assam ha ka janmiet Sngi Ba-ar.
“U dang don ha lynti bad ngi dang wanrah ïa u sha Meghalaya,” la ong ka tyllong khubor na ki pulit.
Ka tyllong khubor ka ong ruh ba kin dang don shuh ki ban shah kem.
Kumta na liang ka ïingbishar ka la ai jingbit 5 sngi ïa ki pulit ban tohkit halor ki 2 ngut katba ïa uba 3, uba dang don ha lynti, yn sa leit ïalam sha ïingbishar ha ka Sngi Balang, la ong ka tyllong khubor na ki pulit.
