Aizawl, ïaïong:
Kawei ka briew kaba dei ka nong Myanmar ka la shahkem halor ka jingshah pynshisha ba ka la rah ïa u Heroin uba shong dor sha ka T. 42.7 lak na Champhai kaba don ha Mizoram.
Katkum ka jingphah jingthoh jong ki heh pulit la ong, kane ka briew ka la shahkem na ka shnong Zokhawthar ha Ghamphai distrik kaba don ha ka bynta kaba shaphang Mihngi jong ka Mizoram.
Ka la shahkem hadien ba la ïoh jingtip halor kane ka jingrah jong ka ïa u drok.
Kum shi bynta ban khanglad ïa kane ka kam sniew halor ka jingkhaïi drok, ki pulit ha ryngkat ka jingïatreilang ki shipai ki la pynjur ka jingleit thwet ban ïoh kem ïa kane ka briew.
Hadien ba la ïoh jingtip shaphang ka jaka ba kane ka briew ka don, kaba la rah ïa u drok ha katei ka thaiñ, ka kynhun shipai ha ryngkat ka jingïatreilang ki pulit jong ka jylla ki la pynlong ka jingpynap shrip bad ka jingleit khynra ha Zokhawthar.
Ha ka por ba la don ka jingpyntreikam bad ka jingkhmih bniah na ka, ka kynhun pulit bad shipai ka la lap ïa u Heroin uba 61 Grams.
Ïa ka song jong une u drok ba la ïoh ban kurup bad ïa kane kaba la shah kynnoh la aiti sha ki pulit jong ka jylla ha Zokhawthar, la ong ka jingthoh.
Haba la pynlong ïa ka jingkhmih bniah bad ka jingtohkit la shem ba une u drok u shong dor T. 42.7 lak.
Ka jingtohkit ka dang ïaid shakhmat ban lap ïa ka jaka ba la wanrah ïa une u jingdih pynbuaid bad ban tip ruh ïa ka jaka shano ba la thmu ban pynpoi ïa u.
