Bengaluru, ïaïong:
U Myntri Rangbah jong ka Karnataka u Siddaramaiah ha ka Lah Sngi U Blei u la ïohpdiang da ka jingdeng ryndang ba la shna na ki tiket ba la pynïoh shong-ei ha ki bos.
Kane ka jingleh ka long shi bynta jong ka jingpynpaw jingsngewnguh na ka bynta ka jingpyllait ei ïa ka bai leit jingleit khlem donkam ban siew ïa ka bai tiket ha ka bos.
Kane ka jingai sngewbha ka long ban pynpaw ka jingsngewnguh halor ka jingpyllait ei ïa ka bai shong bos na kawei ka khynnah pule Law.
Ka khynnah pule Law jong ka First-Year na Arasikere ka la ai sngewbha da ka jingdeng ryndang ïa u Myntri Rangbah u Siddaramaiah.
Kane ka khynnah pule ka MA Jayashree, ka la tyrwa da u jingdeng ryndang ha ka por ba la don ka jingïalap ilekshon ha kaba la leit ban ïashim bynta da u Siddaramaiah. Katba dang leit ban pyndeng ïa u jingdeng ryndang, ka Jayashree ka la ong, “Ka jingsngewnguh ïa ka sorkar Congress halor ka jingpyllait ei ïa ka bai shong bos, ïa kaba phi la pyntreikam kum u Myntri Rangbah. Nga la lah ban bteng ïa ki jingpule jong nga kum ka khynnah pule Law khlem da shah ktah ha ka liang ka pisa. Namar kane, ïa baroh ki tiket ba ïoh shong kali ei nga la lum bad shna ïa une u jingdeng ha ryndang.”
Shuh shuh ka la pynpaw da kaba ong, “Nga la ïai ap da ki bnai na ka bynta ban ïoh ka lad ban ïakynduh bad ban ai une u jingai sngewbha ïa phi. Haba nga la ïohsngew ba phin wan sha Arasikere mynta ka sngi, nga la wanrah ïa une u jingdeng.”
Hadien ba ka la dep ban pynpaw ka jingai khublei sngewnguh ïa u Myntri Rangbah, ka la ïohpdiang ïa ka jingkyrkhu na u. Kumba la ïathuh la ong ba, ki kynthei ha ka jylla Karnataka ki ju ïoh shong kali ei khlem donkam siew ïa ka bai leit jingleit ha ka jingpyntreikam jong ka Road Transport Corporations (RTCs) hapoh ka jylla.
Ïa kane ka jingïoh jingmyntoi la pyntreikam hapoh ka skhim Shakti, ba la wanrah da ka sorkar Congress ha Karnataka ha ka 11 tarik, Jylliew, 2023.
Ka la long kawei na ki san tylli ki jingkular ba la kular ha ka por ba don ka jingpynbna ïa ki mat treikam ha ka por ilekshon da ka sorkar.
Ki nongïoh myntoi na kane ka skhim ki long ki longkmie bad ki khynnah pule kynthei kiba la lah ban leit jingleit khlem donkam ban siew lada ki shong da ki bos sorkar. Ki briew ki lah ban Apply na ka bynta ka Shakti Smart Card da kaba pynrung kyrteng ha ka Seva Sindhu Government Portal.
