Shillong, Ïaïong 23
Ka lahduh jong ka aïom ba la dep, ka Mawlai Sports Club ka la long ka kynhun kaba la lah ban pynthikna ban jam sha ka semi final ha ka lympung ïalehkai Shillong Premier League 2023, hadien ba la lah ban pynjem khnap ïa ka Shillong Lajong FC da 5-0 kol ha ka Sngi Ba-ar ha SSA Stadium kaba ha First Ground, Polo.
Kane ka nam jop ka la wan urlong lyngba u Fullmoon Mukhim (12), Kevin Rymbai (47), Brolington Warlarpih (49), Donlad Diengdoh (72) bad u Romarius Laban (76) na ka bynta ban ïai bat ha ka kyrdan ba-ar.
Kane ka long ruh ka jingshah rem kput jong ka Lajong ha ka lympung ïalehkai SPL ha ki shiphew snem bad ka donkam ban ïalehkai bha ha ki ar tylli ki jingïalehkai kiba dang sah khnang ban pynthikna ban ïoh rung sha ka semi final.
Ha kane ka jingïakhun ki rangïalehkai ka Mawlai ki la lah ban pynpaw ïa ka jingtbit naduh kaba sdang ha kaba ka la ïoh ïa ki kabu kiba biang bad dei ha ka minit kaba 12 ka la ïoh ban pynkhih jar nyng-kong eh lyngba Fullmoon.
Kane ka shi kol ka la pynlong ïa ki rangïalehkai ka Mawlai ban nang ïoh mynsiem shuh shuh na ka bynta ban ïai bteng ha ka ban ïakhun tyngeh bad ka la ïoh ïa ki katto katne ki kabu kiba biang, hynrei kam shym la lah ban thep kol. Te kumta haduh kaba kut jong ka kylla step ka Lajong ka dangshah tam da 1-0 kol ha ka Mawlai.
Hadien ar minit ba la bteng ïa ka jingïakhun kaba ar, ka Mawlai ka la pynbud biang ïa ka kol kaba ar lyngba u Brolington Warlarpih. Kane ka kol ka la nangpynskhem ïa ka Mawlai ban nangjan sha ka thong jong ka jingjop, hynrei ka la nangpynshaïong ïa ki rangïalehkai ka Shillong Lajong.
Ka Mawlai ka la thep biang ïa ka kol kaba lai ha ka minit kaba 49 lyngba u kapten u Brolington, uba la ïoh ban shut beit sha kol bad ka bol ka la lait na kti u rangapkol u Haokip bad ka la rung hi jlang.
Watla ka Lajong ka la kylliang noh da uwei pat u rangapkol u Wanteilang Malngiang, hynrei kane kam shym la lah ban ïarap ban khanglad na ka jingshah thep kol ha ka Mawlai.
Ka Lajong ka la ïoh ïa ki kabu kiba biang lyngba u Shano Tariang, hynrei u rangapkol ka Mawlai u Siwel Rymbai u la lah ban khnanglad na ka jingshah thep. Kumjuh u Deibor u la ïoh ban shut beit sha kol, hynrei um shym la lah ban pynurlong.
Ka Mawlai ka la ïoh ban thep ia ka kol kaba saw lyngba u Donlad ha ka minit kaba 72 bad ïa ka kol kaba khatduh da la thep ha ka minit kaba 76 da u Romarius. Haduh kaba kut ka jingïalehkai ka Lajong kam shym la lah ban pynphai wat tang shi kol ruh bad ka la mad ïa ka jingshah rem kaba ar ha kane ka lympung.
Lyngba kane ka jingjop kaba saw ka Mawlai ka la kamai 13 point bad duna ar point ia ka Rangdajied United, kaba don ha ka kyrdan ba hakhlieh, katba ka Shillong Lajong ka danghap ban ïaknieh ryngkat ka Ryntih SC bad ka Langsning, kiba don ha ka kyrdan ba saw bad basan.
Ka jingïalehkai ha ka sngi Balang kan long hapdeng ka Ryntih SC pyrshah ïa ka Sawmer SC ah ka por 3:15 janmiet. Lada ka Ryntih ka lah ban khur ïa ka jingjop ka lah ban knieh noh na ka Lajong ïa ka kyrdan balai, katba ka Sawmer ka dangdonkam ban khur ïa ka jingjop kaba nyngkong ha kane ka lympung.
