Shillong, Ïaïong 24
Ar ngut ki dkhot ka KSU kiba la shah kem halor ka jingkynnoh bad suba ba ki donkti ban pynïap ïa ki nongbylla bar jylla, ki la shah rai ban shah set ha along ki pulit (police custody) hadien ba la dep ban tian bishar da ka ïingbishar District Court ha ka Sngi Balang.
Kine ar ngut kiba la shah kem ki kynthup ïa u Gary Rinaldy Mawlieh, 25 snem na Mawlai, uba la shah kem halor ka jingjia ha Lumsohkhlur, Mawlai Mawroh bad uwei pat u dei u samla Cleenstar Shabong, 27 snem na Nongthymmai, uba shah kem halor ka jingjia ha Ichamati.
Hadien ba la ïalam ban tian bishar ha ka janmiet ka Sngi Balang, ka ïingbishar ka la pynmih ka hukum ba ïa u Gary Rinaldy Mawlieh ban set haduh 12 sngi hapoh ka along ki pulit katba ïa u Cleenstar Shabong la hukum ban set 7 sngi ha along ki pulit na ka bynta ban pynlong ïa ka jingtohkit.
Ha ka kyrwoh khubor ba la pyllait da u Superintendent of Police (City) ka East Khasi Hills u Pankaj Kumar Rasgania, IPS la ong ba u samla Cleenstar Shabong u dei ruh uba la don bad shah pynngat lypa ha ki 10 tylli ki mukotduma nalor ar tylli ki mukotduma pat ha ka jingjia ha Ichamati. Katba u Gary pat nalor kane ka mukotduma ba ïadei bad ka Mawlai Mawroh, u dei ruh uba la don lypa haduh 3 tylli ki mukotduma, ha kaba napdeng kine, ar tylli la dep ban chargesheet.
U SP City u la pyntip ba ka jingkem ïa kitei ki briew ka dei hadien ka jingdon ïa ki sakhi sabut kiba biang bad na ka liang ki pulit kim don jingtip ba kine ki briew ki dei na kano ka kynhun hynrei ka jingkem ka dei beit halor ki sabut.
Ha kane ka sngi ba la ïalam tian bishar ïa kine ki ar ngut ki dkhot ka KSU kiba la shah kem ha ka Sngi Ba-ar, la ïoh ban sakhi ruh ba ki nongïalam ka KSU Sengkmie ki la ïalum ha surok kaba hakhmat ka ïingbishar kum ka dak ban pynpaw ïa ka jingkyrshan bad ka jingai mynsiem.
Ha ka por ba la dep ban tian bishar bad katba ki pulit ki dang ïalam ïa kine ki dkhot ba shah kem, ki nongïalam bad ki dkhot kiba la ïalum ha kane ka jaka, ki la pyrta ruh da ka kyntien ‘Maitshaphrang Khlur ka Ri, Im Slem ka KSU’.
