Mumbai, ïaïong:
Ka Election Commission of India (ECI) ha ka Sngi Ba-ar ka la ai ïa ka hukum ban pynshitom da kaba tyngeh pyrshah ïa u Director jong ka NSVM Fulwari School ha Nagpur halor ka jingpyndonkam ïa ki khynnah skul ban pdiang burom ïa u kyrtong jong ka seng BJP u Nitin Gadkari ha ka jingïalap ilekshon.
Kum shi bynta ban pyntreikam halor ka jingmudui jong ka seng Congress halor ka jingpynkheiñ ïa ka Model Code of Conduct, ka kynhun khmih ïa ki kam ilekshon ka la hukum ïa ki heh ba dei khmih ba ki la dei ban leh ïa kaba donkam na ka bynta ban pynshitom ïa u Director jong ka skul.
Ka seng Congress ka la buh jingkylli ba lano ka jingpynshitom kan long pyrshah ïa u kyrtong jong ka seng BJP.
U Chief Electoral Officer (CEO) u S Chockalingam um shym la ai jubab eiei ha kaba ïadei bad ka ‘Call’ bad ka jingphah ïa ki ‘Message’ halor kane.
Ha ka 3 tarik, Ïaïong, u nongaiktien jong ka seng Congress u Atul Londhe u la buh da ka jingujor pyrshah ïa ka seng BJP bad ïa u Gadkari halor ka jingpynkheiñ ïa ka Code of Conduct.
“Ki khynnah skul na ka skul NSVM Fulvari ki la shah pyndonkam ha ka seng BJP bad u kyrtong jong ka na ka bynta ka jingïalang paidbah ba la long ha ka 1 tarik, Ïaïong ha Vaishali Nagar. Kane ka jingleh ka la pynmatlah ïa ka aiñ bad la dei ban shimkhia halor jong ka,” la ong ki nongmudui.
U Londhe u la pyni bad tah ruh da ki dur bad buh ruh ïa ki durkhih ban pynshisha halor kane.
“Ha ka por ba la pynlong ïa ka jingbishar bad ka jingkhmih bniah ïa ka jingthoh ba la phah da u Principal jong ka skul, u School Director u Murlidhar Pavnikar la shem ba ki la leh ïa kaba bakla ha ka ban pyndonkam ïa ki khynnah skul na ka bynta ban pdiang burom ïa u Nitin Gadkari ha ka por ba la don ka jingïalap ilekshon. Namar kata, ngi la hukum ïa ki heh sorkar ba kin leh ïa kaba don kam na ka bynta ban pynshitom ïa ki katkum ki kyndon ba la buh,” la ong ka jingthoh bad ka hukum ba la phah da ka ECI ha ka sngi Ba-ar.
Wat lada ka seng Congress ka la pdiang ïa ka rai ba la ai, ka la ong ba ïa ka jingmudui la buh pyrshah ïa u Gadkari hynrei haduh mynta ym pat don kano kano ka jingpynshitom ka ban long pyrshah ïa u.
“Wat lada ka la sngewïahap halor kajingshah pynshitom jong ki bor pynïaid skul, kam pat shym la don kano kano ka jingpynshitom ka ban long pyrshah ïa u kyrtong jong ka seng BJP,” la ong u Londhe ha kaba u la buh jingkylli ruh da kaba ong, “Lano yn pynshitom pat pyrshah ïa u Gadkari?”
