Bengaluru, ïaïong:
U Myntri jong ka sorkar kmie uba dei khmih ïa ka tnat pohïing u Amit Shah ha ka Sngi Ba-ar u la pynlong ïa ka jingïalap ilekshon kaba heh ha ka nongbah Bengaluru, ha kaba la ïohi ba u la kaweh kti ïa ki paidbah ba bun kiba la don ha surok.
Kumba la sakhi, la ong ba u Shah u la ïeng ha ka kali kaba la pynitynnad bha bad ai khublei ïa ki paidbah kiba la ïeng ha arliang ka surok ba u la dei ban ïaid na ka bynta ka jingïalap ilekshon. Kiba bun ki la ïapyrta da ki kyntien ban ai ka jingïaroh ïa u Modi bad kiwei pat ki kyntien ha kaba kane ka la long ka sngi kaba pynkmen bad ai jingkyrmen ïa ka seng ha kaba la ïohsngew ruh ïa ka jingtied bad ka jingsawa jong ki ksing ki bom ha kiba bun ki jaka.
Ki briew ki la kawang syntiew katba u Shah u dang ïaid da ka kali ha shi lynter jong ka surok ha ka Bangalore South Lok Sabha konstitwensi, kaba dei ka jaka ba bat ka seng BJP.
