Shillong, Ïaïong 24
Ka Khasi Jaiñtia Food & Vegetable Suppliers Association (KJFVSA) ka la ai por 24 kynta ïa ki nongkynthoh ha ki rynsan lad pathai ban pynshai halor ka jingkynnoh lum pisa be-aiñ jong ka kynhun lem bad ki sengbhalang na ki trok kit mar bam ha Lad Smit.
“Nga kwah ban pynshai khyndiat halor ki jingkynthoh kiba la mih ba ka KJFVSA, HNYF bad FKJGP ba ki don bynta ban lum pisa be-aiñ. Ngim don ïa kaba kum kata, katkum ka jingtip jong ngi haduh mynta, kam don kaba kum kata. Hynrei ka jingkhmih bniah ïa ki ‘challan’ ka don beit,” la ong u President, Bah Henry Dkhar haba kren sha ki lad pathai khubor.
U la ong ruh ba ha ka jingkhmih bniah ïa ki ‘challan’ la ïoh jingkheiñ ba ka jingmih u jhur na ka Jylla ha ka shi sngi (ha u snem ba la dep) ka long 1, 50,000 kilo.
“Ngi bat ïa ki kali kit mar bam kumba la paw ha ki lad pathai khubor ba kane ka mar ka bun kaba ïaid sha Bangladesh. Ynda ngi la khmih bniah ïa ki ‘challan’ bad kheiñ, ka mih haduh 2 lak kilo shi sngi,” u la ong.
Haba kdew ba bun bah u mar bam kum u piat, u phan ki leit sha Bangladesh, u Bah Dkhar u la ong, “Haba ka mar jong ki nongrep kaba mih na Jylla ka bsa ïa ka Thaiñ Shatei Lam Mihngi baroh kawei, katba tang ha Meghalaya ka la poi 2 lak ton. Kumta, ban lait shah ktah ki paidbah, ka kynhun ka mih shakhmat da ka jingshimkhia lang jong ka shnong, FKJGP bad HNYF.”
Halor ka jingkynnoh lum pisa be-aiñ, u la ban biang kam don kaba kum kata, hynrei la shu peit bad shon dur tang ïa ki ‘challan’ bad kheiñ ïa ka mar ban ïoh jingkheiñ.
“Mynta haba ngi la ïoh jingkheiñ…2 lak kilo ha ka shi sngi, kata ka mar ka leit shaei, ngi buh jingkyli ïa kata,” u la ong.
U President u la pynsngew ruh ba kito ki bym don ‘challan’ – ka dei ka jingduhnong kaba khraw ïa ka Jylla, ha kawei ka liang kaba mut ba kita ki mar bam ki wan khlem ka GST. Ha kajuh ka por, haba pynshai ba ki mar bam mynta ki la don lut ïa ka GST, u Bah Dkhar u la ong, “Ka mar kaba leit hi sha Bangladesh, ka mut ka wan khlem GST. Kam dei ka jingïohnong hynrei ka jingduhnong ïa ki paidbah bad u ïohnong da uwei pat.”
Na ka liang u Sordar ka shnong Umphyrnai, Bah L. Kharkongor uba la kubur ïa ka jingai jingkyrshan jong ka shnong ïa ka KJFVSA halor katei ka bynta, u la kyntait ïa ka jingkynnoh ba ka don ka jinglum pisa be-aiñ.
Shuh shuh u dkhot ka HNYF, Bah T. Swer haba kren halor ki bar-jylla kiba wan khaïi sha ka Jylla, u la bynrap, “Ynda la ïoh bat ïa ki kali, la wan beit ki Khasi. Katkum ka ‘challan’ haba ngi peit, ka don da ka kyrteng bar-jylla, hynrei la wan kam beit da ki briew jong ngi…bad lada pan ka jingpynshai na ki briew jong ngi, kim don.”
“Lada ka tnat ba dei khmih ïa kine, kam leh eiei, ngim banse ban mih sha madan,” u la ong.
