Shillong, Ïaïong 24
Ki runar bym lah ban ithuh, ki la kawang petrol bom ïa kawei ka kali pulit (police escort) kaba la jia ha ka janmiet jong ka Sngi Balang.
Katkum ka khubor kaba la ïoh lum la ong ba kane ka jingjia ka la jia ha ka por kumba 7:30 eiei janmiet ha ka thaiñ Demthring kaba dang hap hapoh ka thanat Madanrting.
Shuh shuh ka khubor ka la ïathuh ba kane ka kynhun ki pulit ka dei kaba dang synran ïa ki briew jong ka NEEPCO ban leit sha Laitkor bad ha kane ka por la ong ba la don ka kynhun ki nongñiah thuk-thuk, kiba la kawang petrol bom sha kane ka kali ki pulit kaba dang sahkut ha ka dheng kali.
Ha kane ka jingjia, ym shym la don satia kiba la mynsaw naba ki pulit kiba don ha kane ka kali, ki la lah ban pynlip noh kloi-kloi ïa ka ding. Na ka liang jong ki pulit ki la dep ban pynrung mukotduma bad ka jingtohkit ka la ïaid shakhmat.
