Tura, Ïaïong 24
Kawei ka kali Bolero Pick-up kaba la kit 24 ngut ki briew ka la kylla hapdeng surok ha ka thaiñ Kanhai jong ka Rongara, South Garo Hills ha ka Sngi Balang, hynrei ym shym la don satia kiba mynsaw jur.
Katei ka kali kaba don da u nombor na Assam ka dei kaba la ñiah da u briew ba la tip kyrteng kum u Jittu Ch Sangma.
Ka jingkylla jong katei ka kali ka la long ha ka por kumba 2:30 mynsngi ha Chengkni Champa bad ki 24 ngut ki briew kiba la shong ha ka kali ki dei kiba hapdeng 16 bad 24 snem ka rta. Hynrei ym shym la don kiba mynsaw jur bad la kit ïa baroh ki 24 ngut sha kawei ka jaka sumar ba marjan ban shu pyntah dawai bad la pyllait noh ïa ki.
Ki khubor ki ïathuh ba ka jingkylla jong ka kali ka dei namar ba u nongñiah u la pynher sted palat haduh ba u khlem lah shuh ban teh lakam ïa ka kali.
