Hyderabad, ïaïong:
Ha ka por ba ka ilekshon Lok Sabha ka dang ïaid shakhmat, la ïoh jingtip ba ki la don kumba katto katne ngut ki Myntri ha ka Kynhun Myntri ba la lamkhmat da u Myntri Rangbah jong ka Telangana u A Revanth Reddy kiba la ïapher jingmut bad kane ka la pynkhuslai shibun na ka bynta ka seng Congress.
Kumba la ïathuh ka tyllong khubor, la ong ba ka jingsam ïa ka tiket ka la i kumba ka long ka daw ka ban wanrah ïa ki kynrum kynram naba ki la don kumba katto katne ngut ki Myntri kiba la kynshoit ban phah pynrung kyrteng da kiba ki sngew mon. Kumjuh ruh ki la don ki kaiphot kiba la ong ba ki la don kiba kwah ban long kham halor ha ka kynhun jong ka seng Congres ha Telangana, ha kaba kane ka la wanrah ïa ka jingïapher jingmut bad ki kynrum kynram.
Ki jingkren ba dang shen jong u Revanth ki la long ki daw ban wanrah ïa kine ki kynrum-kynram, shuh shuh la ong ba ki la don lypa ki jingïapher jingmut bad ki jingïaphiah hapdeng ka jingïadei jong ki Myntri, la ong ka tyllong khubor .
Kine ki jingkren ki la wan ha ka por ba ka seng ka la ïakynduh jingeh ha ka ban pynkhlaiñ ïa ki rukom treikam ka seng ban ïakhun ïa ki bor ba pyrshah ba wan na ka seng BJP bad ka BRS. Ka jingsahteng ban ai ïa ka tiket na ka bynta ka Khammam Lok Sabha konstitwensi ka la wanrah ïa ka jingïapher jingmut. U Symbud Myntri Rangbah u Mallu Bhatti Vikramarka bad u Myntri sorkar u Ponguleti Srinivas Reddy baroh arngut ki la pynbor ba la dei ban ai ïa ki tiket sha ki bahaïing jong ki. Kane ka la pynlong ban buh jingeh ha kaba ïadei bad ki jingpyntreikam ha kaba ka la buh jingma ha kaba ïadei bad ka jingïatylli hapoh ka seng.
Kumba la pynshisha, la ong ba sa uwei pat u Myntri u Thummala Nageswara Rao, u la kwah ba ïa ka tiket la dei ban ai sha u khun jong u u Yugandhar ha kaba kane ka la nang theh umphniang sharak shuh shuh ban pynklang ïa ka ding, ha kaba kane ruh ka la long ka daw ka ban wanrah ïa ka jingïabuh shun ka ban ktah jur ïa ka ilekshon ka ban wan.
