Shillong, Ïaïong 24
Ka Khun Hynñiewtrep National Awakening Movement (KHNAM) ha ka Sngi Balang ka la ujor sha u Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem halor ka jingïoh kontrak jong uwei bar jylla ha North Eastern Indira Gandhi Regional Institute of Health and Medical Sciences (NEIGRIHMS) khlem da ïoh laisen khaïi (trading license) na ka Council.
Haba kren sha ki lad pathai khubor hadien ba la dep ban ïakynduh ïa u CEM, u Working President ka KHNAM u Bah Thomas Passah u la ong, nalor ba une u bar jylla u la ïoh ka kam kontrak ha NEIGRIHMS, u la thmu ruh ban beh kam ïa ki Khasi.
U Bah Thomas u la ïathuh ba ha kane ka jingïakynduh, u CEM u la kular ban tuklar mardor da kaba thoh sha ki bor ka NEIGRIHMS halor ka rai jong ka Council ban nym ai laisen khaïi sha u kontraktor uba pyntrei hapoh katei ka hospital katkum ka Trading by Non-Tribal Regulation 1954.
Une u nongïalam ka KHNAM u la ong, ka jingdawa ka seng ka dei katkum ka section 3(A)(e) jong ka Trading by Non-Tribal Regulation, 1954 kaba la kdew ba ‘Ka jingdon ki nongkhaïi bar Jylla ka la tam ïa ka jinglah ka executive committee ban ai liasen katkum ki kyndon’.
U Bah Thomas u la ong ba katkum ka kyndon jong ka Trading by Non-Tribal Regulation, u bar jylla ba pyntrei ha NEIGRIHMS u dei ban ïoh ka laisen khaïi, kumta ka seng ka la kyntu ïa u CEM ban thoh sha ka NEIGRIHMS ban batai ba ka KHADC katkum ki kyndon kam lah ban ai laisen khaïi namar ki don ki trai jylla kiba lah ban trei ïa kane ka juh ka kam.
Shuh shuh u Bah Thomas u la ong ba une u bar jylla nalor ba u la ïoh ka kam kontrak, ka la don ka jingthmu ruh ban beh kam ïa ki Khasi bad bynrap ba kam ïahap ban pynduh kam ïa ki trai Jylla ha la ka jong ka Jylla.
“Ngi ïaroh ïa u CEM uba la kular ban shimkhia ïa kane kam bad ban thoh sha u Deputy Director ka NEIGRIHMS ba ka Council kam lah ban ai laisen khaïi ïa u Singhania, uba la ïoh kam kontrak ha NEIGRIHMS,” u la ong.
“Ha ka taïew ba la dep, ngi la dep ruh ban ïakynduh ïa u Deputy Director (Admin) ka NEIGRIHMS hadien ba ngi la ïoh jingtip ba la ai kam kontrak ïa u bar Jylla uba khlem pat ïoh trading license na ka Council,” u la ong bad bynrap ba u Deputy Director u la ong ba ïa ka kam la aiti ha u Singhania da kaba bthah ruh ba u dei ban pynbiang ïa ka laisen khaïi na ka council.
