Shillong, Ïaïong 24
U President ka Khasi Students’ Union (KSU), samla Lambokstarwell Marngar haba pynpaw ïa ka jingbitar halor ka jingshah tan bad shah pharep ki dkhot ka seng, u la ong ba kane ka pyni ba ka sorkar ka khot bad kwah ban mih ki kynrum-kynram.
“Ngim shym la kwah ban pynmih kino-kino ki huri-hura, hynrei ngi ïohi ba kumba ka sorkar ka khot sngewbha ban mih kita ki kynrum-kynram,” la ong u samla Lambok-
starwell haba kren sha ki lad pathai khubor ha ka Sngi Balang ha ka por ba ki leit ban ïalum hakhmat ka ïingbishar.
Nalor nangta u la ong ha kaba ïadei bad ka jingshah kynnoh shah pharep jong ki dkhot ka KSU na kawei ka jingjia sha kawei ka jingjia, kum ka seng ka la shu ïai sngap bad ïai shah baroh shi katta.
Une u nongïalam ka KSU u la ong ba ki don kita ki ‘Agency’ jong ka sorkar, ha kaba tang shu don kino- kino ki jingjia ki la shu peit khmat ïa ki dkhot ka KSU bad ïohi ruh ba la shu mareh ban leit kem ïa ki samla Khasi bad ki dkhot ka KSU, kaba pyni ruh ba ka aiñ ka long kaba noh shiliang.
“Ngi phah ka kyrwoh kaba shai sha ka Sorkar ba lada ka kwah ban ïalehkai bad ban aiding ïa ki samla ka bri u hynñiewtrep, kumta kito kiba bat ïa u lakam jong ka synshar-khadar ki mat sa shim ka jingkitkhlieh,” la ong u samla Lambokstarwell.
Kane ka jingkem ïa ki dkhot KSU kam dei shuh kaba dang thymmai namar ha man ba don kino-kino ki jingjia, ki pulit kin thwet bad kem shwa ïa ki dkhot ka seng, ka dei kaba la jia ha ki snem ba la leit noh bad ka dang ïai bteng haduh mynta, la ong u samla Lambokstarwell.
“Ngim shym la kwah ban pynmih kino-kino ki huri- hura, hynrei ngi ïohi ba kumba ka sorkar ka khot sngewbha ban mih kita ki kynrum-kynram,” u la ong bad bynrap ba ka jingjia shah pynïap jong u samla Lurshai Hynñiewta ha Ichamati, shano jah kiba donkti pynïap ïa une u samla? Ki pulit ki la shu ong ba la kem, hynrei ym tip shano ki set bad ym ïohi ruh ïa ki dur ki dar jong kiba shah kem.
U la ong ba kane ka jingbym ler jong ka sorkar, naba ha ka jingjia ha Ichamati la ïohi pylleiñ-pylleiñ lyngba ki ‘YouTube’ ba kito ki briew ki la rah tiar, hynrei ïa ki samla Khasi bad KSU pat tang shu suba la shu tan bad pharep bad pynngat ha ki kyndon aiñ bapher-bapher.
“Kam pher lada phi kem ruh, ngim rit mynsiem bad katba ki dang pyntyrha ngi dang khlaiñ, bad lada theh shi theh petrol ka Sorkar ka hap ban sngewthuh kumno ruh ban pynlip ïa ka,” la ong une u nongïalam ka KSU.
Shuh shuh na ka liang ki nongïalam ka KSU ki la pyntip ba kin sa khot ïa ka jingïalang ban ïakren halor kine kiei-kiei baroh bad kan sa shim ïa ka rai kaei kaba dei ban leh nangne shakhmat.
