Shillong Ïaïong:
Ka jingpahara ki pulit Central Armed Police Force (CAPF) ka long bun syrtap ha ki jaka ba buh ïa ki kor thep ‘vote’ tad haduh ban da poi ka sngi ñiew ‘vote’ ha ka 4 tarik u Jylliew.
La ong ba ka Jylla ka dang bat sa katto-katne pyrton ki pulit CAPF kiba dang don mynta ha Jylla ban pynkhlaiñ ïa ka jingpahara ha ki jaka kiba buh kyrpang ïa ki kor thep ‘vote’ (EVM bad VVPAT) ha Shillong bad Tura.
Na bynta ka Shillong Parliamentary konstitwensi ki don 8 tylli ki jaka kiba la buh kyrpang ïa ki kor thep ‘vote’ ha ryngkat ka jingpahara kaba khlaiñ. Katba na ka bynta ka Tura Parliamentary konstitwensi ki don 5 tylli ki jaka kiba la buh ïa ki kor thep ‘vote’.
Kine ki jaka ba buh ïa ki kor thep ‘vote’ kin long ruh ki jaka ban ñiew ‘vote’ ynda la poi ka sngi ñiew ‘vote’.
La ong ba ki pulit CAPF lem bad ki pulit ka Jylla ki la don baroh 24 kynta ban pahara ïa kine ki jaka kiba don ha kylleng ki district ha kaba ki nongpynïaid ïa ka ilekshon ki la leit rah ïa ki EVM bad VVPAT sha kine jaka.
Kum ban pynkynmaw, ka jingthep ‘vote’ na ka bynta ka Shillong bad Tura Parliamentary konstitwensi ka la long ha ka 19 tarik mynta u bnai kaba hap ruh ha wat banyngkong jong ka jingthep ‘vote’.
Kumta ha ka sngi ñiew ‘vote’ yn kham pynkhlaiñ shuh shuh ïa ka jingpahara bad kan kham long bun syrtap namar ka sngi ñiew ‘vote’ ka dei ruh kaba kham shongshit ki paidbah.
