Dublin, ïaïong:
U Myntri Rangbahduh ka Ireland, u Simon Harris, ha ka Sngi Ba-ar u la phah ia ka khubor sngewlem sha ki bahaiing- bahasem jong kito 48 ngut kiba la duh ei ia ka jingim na ka jingkem ding ka jaka leh kmen ‘Night Club’ hapoh Dublin ha u snem 1981.
Kitei kiba khlad ha katei ka jingjia ki kynthup ia kiba naduh 16 snem haduh 27 snem ka rta bad ki la khlad noh baroh ha ka 14 tarik u Rymphang jong utei hi u snem 1981 ha kaba katei ka jingpluh ka la jia ha katei ka jaka leh kmen kaba don ha Artane, sha ka phang Shatei jong ka Dublin.
Ha ka Sngi Palei, la ong ba ka kynhun ki 12 ngut ki dkhot jong ka kynhun wad bniah, ki la tih bniah haba iadei bad katei ka jingjia kaba la shim ia ka jingim jong baroh 48 ngut kitei ki briew kiba don ha katei ka jaka ha utei u snem ba katei ka jing pluh ka la jia.
Kumta, utei u nongialam ha katei ka sngi u la ong ba ha kane ka por na ka liang ki bor pyniaid bad ka sorkar jong ka ri, ki pynpaw ka jingsngewlem kaba khraw na ka bynta kitei ki lanot kiba ngat ha katei ka jingjia kaba shyrkhei ha utei u snem bad namar ba ki bor pyniaid kim shym la lah ban tehlakam ia katei ka jingjia ne ban pyllait im ia ki ha ka por kaba biang.
Ha katei ka jingtih bniah bad jingbud dien jong katei ka kynhun haba iadei bad katei ka jingjia, la shem ba 42 ngut ki dei kiba la khlad hapoh jong katei hi ka jaka leh kmen. Katba ki 6 ngut pat ki dei kiba la khlad ha ki jaka sumar lane hadien ba la ioh ban sei noh na katei ka jaka ba la pluh ha katei ka por.
Hynrei, ka daw jong ka jingduh noh jongki ia la ka jingim ka long namar ka jingioh ring mynsiem jong ki ia ka lyer bih kaba mih na katei ka ding kaba klang ha katei ka jaka kaba don ruh ia ki jait jingdih kiba pher bad la ong ba kato ka lyer kaba mih na katei ka jaka ha katei ka por ka long kaba sniew bad long bih haduh katta. Dei namar kane ka daw ba kitei kiba don ha katei ka jaka baroh kim shym la lait im shuh namar ka jingioh ring mynsiem ia katei ka lyer kaba sniew ia ka met bad ki nud – ki tor hapoh ka met u briew.
