Shillong , Ïaïong 24
U Carlos Tevez uba long u rangïalehkai barim ka West Ham, Manchester United bad Man City, u la poi shah sumar ha kawei ka aspatal kaba ha Buenos Aires namar ka jingpang shadem.
Ïa une u rangïalehkai shakhmat ba la 40 snem ka rta la pynkit sha jaka sumar ha ka miet jong ka sngi Ba-ar hadien ba ki la paw ki dak ki shin jong ka jingpang ha ki bynta jong ka shadem. Te kumta u la hap ban thiah ha katei ka jaka sumar baroh shimiet.
U Tevez, uba long u coach jong kawei ka klob kaba na Argentina ka Independiente, u dang hap ban pyndep ïa ki jingpeit bapher bapher hapoh katei ka aspatal ha ka Sngi Balang hadien ba la paw ki dak ki shin ha u jong katei ka jingshitom.
“Ïa u coach jong ngi, u Carlos Tevez la pynkit sha La Trinidad Sanatorium kaba ha San Isidro na ka daw ka jingshitom ha ka shadem,” la pynpaw ka Independiente da kaba ong ba kane ka jingpynkit sha jaka sumar ïa u Tevez ka long shi bynta ban ai jingiada ïa u na katei ka jingshitom kaba u don.
Hashwa ba un leit ïasoh sha ka West Ham ryngkat bad u Javier Mascherano, u Tevez u la sdang ïa ka kam ïalehkai phutbol lyngba ka Boca Juniors bad kumjuh ka Corinthians. Hadien shi snem, u la leit ïasoh sha ka Man United bad kaba la khur ïa ka jingjop ha ka Champions League bad hadien ba la pynlut ia ka por ïalehkai haduh saw snem kynthih bad ka Manchester City.
Kat kum ka kyrwoh lyngba ka Independiente, la ong u Tevez un dang ïai sah ha katei ka jaka sumar khnang ban ïoh ka jingsumar na katei ka jingshitom.
U Tevez u la pynïasoh sha ka Independiente ha u Nailar jong u 2023 bad dangshen u la bteng ban soi ïa ka kontrak kaba thymmai ka ban kut haduh u snem 2026.
Utei u khlur ïalehkai na Argentina u la ïoh ban ïalehkai ha ki katto katne ki klob na Europe kiba kynthup ïa ka West Ham United, Juventus bad baroh ar ki kynhun kiba na Manchester.
