Shillong , Ïaïong 24
Ka hat-trick lyngba u Abdul Fatawu ka la biang pura ïa ka Leicester ban pynliem ïa ka Southampton da 5-0 kol bad kane ka la pynnang jan ïa kane ka kynhun ban wanphai biang sha ka Premier League.
Ïa kiwei pat ki kol la thep da u Wilfred Ndidi bad u Jamie Vardy na ka bynta ka Southampton. Kumta kane ka kynhun ka donkam ban jop ha ar tylli ki jingïakhun dang sah khnang ban rah ïa ka nam lahduh ha ka Championship.
Kane ka jingshah rem ka la pynlong ka jingkhanglad ïa ka Southam -pton ban kiew kyrdan, hynrei ka donkam ban ïakhun tyngeh ha ka ‘playoff’. Katba ka Leicester ka la tam da 4 point ïa ka Leeds wat la kine ar tylli ki kynhun ki dang sah sa mar arsien ïakhun.
Ïa ka kyrdan balai la bat da ka Ipswich Town kaba dang duna haduh 5 point ïa ka City, hynrei ka dang sah sa lai tylli ki jingïakhun .
Ka Leicester hadien ba ka la shah pynhiar kyrdan ka la ïakhun tyngeh naduh kaba sdang jong ka aïom ïalehkai ha kaba ka la ïoh ban bat ïa katei ka kyrdan ba hakhlieh.
Ka jingjop ha ka jingïalehkai shabar na la ïing ha Preston ha ka Lah Sngi U Blei lane ka jingïalehkai ha la ïing pyrshah ia ka Blackburn ha ka sngi kaba khatduh ka la tikma ban wanphai biang sha ka Premier League.
Ha katei ka jingïakhun kaba la long ha ka Sngi Ba-ar, u Fatawu u la ïoh ban pynkhihjar ha ka minit kaba 25 hadien ka jingïarap pynbuh da u Kiernan Dewsbury-Hall. Kane ka shi kol ka la ïai neh haduh kaba kut ka kylla step na ka daw ka jingbym lah ban pynphai da ka liang pyrshah.
Hadien katto katne por ba la bteng ïa ka kylla miet, ka Leicester ka la pynbud ïa ka kol kaba ar lyngba u Ndidi (62). U Fatawu u la pynbud ïa ka kol kaba ar ha ka minit kaba 75 hadien ba u rangapkol ka Southampton u Alex McCarthy um shym la lah ban khanglad na ka jingshah thep.
Ïa ka kol kaba saw la thep da u Vardy ha ka minit kaba 79 lyngba ka jingïarap pynbuh da u McCarthy bad u Fatawu. Hashwa ban wai u Fatawu uba long u rangïalehkai shakhmat na Ghana u la khur syndon ïa ka hat-trick hadien ba u la thep ïa ka kol kaba lai ha ka minit kaba 81 na ka bynta ban khur syndon ïa ka jingjop.
