Dakar, Iaïong:
Ki lehnoh ba la suba ki Jihadist na ka phang pdeng jong ka Mali ki la rahbor bad kem ia kumba 110 ngut ki riew paidbah hadien ba ki la dep bat bad rahbor ia ki baroh ha ki 6 sngi ba la leit.
La ong ba ha ka 16 tarik u Iaiong, 3 tylli ki bos kiba kit ia ki riew paidbah ki la shah bat ha ki lehnoh Jihadist bad kitei ki lehnoh ki la bthah ia kitei ki kali ba ki dei ban leit rung sha kawei ka khlaw kaba don hapdeng ka Bandiagara bad ka Bankass.
Kumta, ki bor pyn-iaid ki la kyntu bad dawa ruh ia kitei ki kynhun lehnoh kiba la bat ia kitei ki riew paidbah naduh katei ka sngi ba kin pyllait noh ia baroh kitei ki 110 tam kiba la shah rahbor ha kitei ki lehnoh naduh katei ka taiew ba la leit.
Hynrei haduh kane ka kynti la ong ba kitei ki 110 tam ki riew paidbah ki dang sahkut bad hap hi hapoh ka bor jong kitei ki kynhun lehnoh ki bym shym la pynpaw pyrthei ialade wat hadien ba ki la ioh ban rahbor ia kitei ki paidbah ha katei ka jingjia.
Namarkata, la ong ruh ba ki la don bun tylli ki jingiakhih paidbah ha katei ka shnong naduh u Nailar mynsnem haba iadei bad ka jingjur ki kam thombor jong kitei ki kynhun lehnoh bad kumjuh ruh ka jingbym lah jong ki bor pyniaid katei ka ri ban pyntikna ia ka jingshngaiñ jong ki paidbah nongshong shnong.
