Shillong , Ïaïong 24
Ka East Khasi Hills Cricket Association ka la sdang sa ïa ka lympung ïalehkai ki khynnah kynthei kaba la tip kum ka U-17 Girls Inter Zonal Cricket Tournament 2024 ha ka Sngi Balang ha kaba ka Sohra Super Nova ka la ïoh jingjop hadien ba pynliem ïa ka STCC Pongtung Lioness da 67 run.
Ha kane ka jingïakhun kaba la long ha madan Shortimai Syiem Stadium kaba ha Smit, ka Sohra Super Nova ka la shimti ban tied nyngkong ha kaba ka la kamai 150 run bad shah pynhap 7 wiket ha ki 20 over. Ka Banrikordor Diengdoh ka la ïoh ïa ka shiteng spah namar ka ïoh 60 run na ki 63 bol. Katba ka Dawanshisha Warlarpih ka la shim 2 wiket na ka bynta ka STCC Pongtung.
Haba wan beh ïa ka thong, ki nongtied ka STCC Pongtung ki la shah pynkhyllem baroh bad kamai tang 83 run ha ki 16.3 over. Ka Dawanshisha Warlarpih ka la tied 42 run na ki 38 bol. Katba ka Adela kmen Lawai ka la shim 3 wiket na ka bynta ka Sohra Super Nova bad ka la ïohpdiang ruh ïa ka nam Player of the Match.
