Nongstoiñ, Ïaïong 24
Ka lympung ïalehkai 29th West Khasi Hills District Level Inter School Athletic Meet 2024 ba la pynlong da ka shlem trei kam jong ka District Sports Officer (DSO) West Khasi Hills ka la sdang ha ka Sngi Balang ha madan Nongpathar.
Ha kane ka lympung ïalehkai kaba lai sngi kynthih, la wan ïashim bynta da 25 tylli ki skul na kylleng saw dong jong ka District ban shim bynta ha la ki jong ki kyrdan ïalehkai kiba kynthup ïa ka Under-14, Under-16 bad ka Under-18 jong ki kynthei bad shynrang.
Ki jingïalehkai ha kane ka lympung ki don byn jait ha kaba ki khynnah ki la ïoh ban ïashim bynta shitrhem, bad ha kane ka sngi la sdang ïa kane ka lympung la pynlong da ka jingïakop mareh 100 mitar jong ki U-18,kumjuh ruh ka jingïakop mareh 100 mitar jong ki Under-16 ki kynthei bad shynrang bad kiwei kiwei.
Ïa kane ka lympung la wan ban plie da u Bah Lakador Syiem (IPS) Commandant 4th BN Sohpian kum u kongsan, ha ka jingdonlang ruh ka Kong Balarina Syiem (DSO), ki nonghikai na ki skul bapher bapher bad kiwei kiwei.
Haba ai jingkren ha katei ka sngi, u Bah Lakador u la ban jur ïa ka dor jong ka mynsiem ïalehkai bad kyntu ïa baroh ki khynnah kiba wan ban ïashim bynta ba ki dei ban don halade shimet shimet ïa ka thong ban long ki briew kiba sted, ban kiew kham shajrong bad long kiba khlaiñ ha ki liang baroh.
Shuh shuh u la ong ruh ba ki khynnah ki dei ban pynleit jingmut ha ki kam ïalehkai khnang ba kin lait na ki jingmlien kiba sniew kiba don hapoh ka imlang ka sahlang kum ka kyiad, u drok bad kiwei kiwei. U la kyntu ïa baroh ba shuwa ban kin iakhun pyrshah ïa kiwei, ki dei ban don shwa ïa ka thong bad ïaleh shwa nalade.
Shuh shuh, u kongsan u la kyntu ïa ki khynnah ba ki dei ban long kiba kohnguh ïa la ki nonghikai, kiba la kham san, ki kmie ki kpa namar ki dei ma ki nongsaiñ dur ïa ka lawei kaba phyrnai ka jong ki, la ka dei ha ki kam ïalehkai ne la ka dei ha ka pule ka puthi ruh kumjuh.
Ka jingthmu jong kane ka District Level Inter School Athletic Meet 2024 ka long ban kyntiew ïa ka sap ïalehkai jong ki khynnah khnang ba kin nangsan nangroi bad ba kin long ki ban kyntiew ïa ka imlang ka sahlang la ka dei ha ki kam ïalehkai lane kiwei kiwei pat ki kam ki ban pynmyntoi ïa ka jingim ka jong ki.
