Shillong, Ïaïong 24
Ka por ban pyndep ïa ka bynta ba den ïa ka Pung Umïam la pynjlan shuh shuh sha ka 30 tarik Jylliew bad na ka liang ka IIT Guwahati ka la ai jingmut ruh ban pynbit pynbiang syndon ïa ka bynta jong ka jingkieng ym tang ban shu pynthymmai ïa ki ‘bearing’ kiba don hapoh jong ka jingkieng.
Ïa kane la ïathuh da u Chairman cum Managing Director ka MeECL u Sanjay Goyal haba ïakren bad ki nongthoh khubor ha ka Sngi Balang.
U Goyal u la ong ba hadien ba la shim lang ïa ka jingmut jong baroh khamtam na ki ‘riewshemphang, la pynjlan ïa ka por ban pyndep ïa ki kam kiba ïadei bad ka jingmaramot ïa ka bynta ba den ïa ka pung Umïam bad kumjuh ruh ban pynbit pynbiang shuh shuh ïa ka bynta jong ka jingkieng nalor kaba shu maramot (refurbish) ïa ki ‘bearing’ kiba don hapoh jong ka jingkieng.
U la ong ba ki kam haba ïadei bad ka jingmaramot ïa ka bynta ba den (dam) ïa ka Pung Umïam la lah ban pyndep kumba 60 na ka 100 haduh mynta bad sa 40 na ka 100 yn sa pyndep ha kine ki bnai haduh ka 30 tarik Jylliew bad hadien kane yn pyllait lut ïa ki kali ban ïaid baroh arliang. Ka jingmaramot ïa ka dam la leh lyngba ka skhim Dam Rehabilitation Improvement Project (DRIP) kaba wan lyngba ka Sorkar Pdeng.
Haba ïadei bad ka jingkieng ha Pung Umïam, u Goyal u la ong ba naduh basdang ka kam kaba dei ban leh ka long ban bujli ïa ki ‘bearing’, hynrei ynda la pyntrei bad rah ïa ka bynta jong ka jingkieng, ki ‘riewshemphang ki lap ba kam long kaba biang ban bujli hynrei ka long kaba biang tang ban maramot ïa ki bearing kiba rim. Kumta la rah ïa ka bynta jong ka jingkieng shalor bad la shu maramot ka ki bearing hadien ynda la dep ia kane la pynhap biang ïa ka jingkieng ban pynshong ha ka jaka ba ka ju don.
Haba kylli shuh shuh halor ki kam ban maramot syndon lang ïa ka bynta jong ka jingkieng (retrofitting of the bridge), u Goyal u la ong ba ka IIT Guwahati ha ka kaiphod ka la ong ba ka jingkhmih bniah ïa ki bynta jong ka jingkieng la ïakren bad ka Central Soil & Material Research Station (CSMRS) na ka bynta ban pynkhreh ïa ka kaiphod bad jinglut jingsep kaba bniah bad hadien kane yn sa leh ïa kaba donkam.
U la ong na ka bynta kane, yn khot ‘tender’ noh shen khnang ba yn lah ban pyntreikam bad pyndep katkum ka por ba la buh.
U Goyal u la ong ruh ba lada maramot ïa ka bynta ba shakhrum jong ka jingkieng, ym da donkam eh ban pyrkhing ïa ka jingïaid ki kali namar kan nym don jingktah ha ka por ba trei ïa ki kam maramot.
Haba kylli shaphang ka jinglut-jingsep ban maramot ïa ka bynta ba den ïa ka dam bad ka jingmaramot ïa ka jingkieng, ka jinglut kan long la kumno-kumno T.30 klur.
