New York, ïaïong:
Palat 130 ngut ki paidbah nongïakhih ki la shah kem noh hadien ba la mih ka jingiakhih jur jong kitei ki paidbah ha ka phyllaw jong ka skul bah ba heh jong ka nongbah New York namar ka jingpyrshah ia ka thma hapdeng ka Israel bad Palestine kaba la neh da ki bnai.
Namar la ong ba ki la don bun tylli ki skul bah ka America kiba la sakhi ia kum kitei ki jingiakhih paidbah bad kiba la jia ha kylleng ki bynta jong ka United States namar ka jingpyrshah ia ka thma hapdeng ka Israel bad nong Palestine kiba don hapoh ka nongbah Gaza.
Kine ki jingiakhih paidbah ki long ruh naduh ba ka Israel hi ka la leit ban kput ia ka Gaza namar ka jingleit thombor jong ki lehnoh Hamas pyrshah ia ka Israel ha ka 7 tarik u Risaw jong u snem ba la leit.
Kumta ki pulit ka New York ha ka Sngi Ba-ar ki la iathuh ba ki la ioh bat noh ia kumba 133 ngut kitei kiba ia don bynta ha katei ka jingiakhih paidbah hapoh New York University (NYU) bad ki la iathuh ruh ba katei ka jingiakhih ka la pur sha kiwei- kiwei de ki thaiñ kum hapoh Yale, Columbia bad ha kiwei de ki jaka pule bad ki skul bah jong ki nongbah bapher bapher.
