Ampati, Ïaïong 24
Hadien ka jingthombor jong ka kynhun ki runar kaba la leh be-ijot ïa 2 ngut ki khynnah kynthei ba hapoh 18 snem ka rta hajan Chenga Benga Mela, South West Garo Hills (SWGH), ki pulit ka distrik ki la kem noh ïa 4 ngut ki briew kiba suba donkti ha katei ka kam.
Kumba la suba baroh shi katta, baroh kitei ki 4 ngut kiba la shah kynnoh donkti ki dei ki nongshong shnong ka South Salmara distrik, Assam.
Ha ka 16 tarik mynta u bnai, ha la ki jong ki jong ki jingjia ba la donkti da katei kajuh ka kynhun runar na Assam, 2 ngut ki khynnah kynthei ba hapoh 18 snem ka rta ki la shah leh be-ijot katba ki paralok shynrang jong ki, ki la shah shoh ha katei ka kynhun hashuwa ba kan (kynhun) phet krad na katei ka jaka hadien jong katei ka jingjia.
Haba ïadei bad katei, la pynngat ïa 3 tylli ki mukotduma ha thanat Ampati ha ka 18 tarik mynta u bnai, ïa kaba la sdang pat ïa ka jingtohkit.
Hadien ka jingbuddien, ki pulit ka SWGH ki la kem noh ïa 2 ngut ha ka Sngi Ba-ar bad sa 2 ngut kiwei pat ha ka step Sngi Balang ha ka jingïatreilang hapdeng ki pulit Meghalaya bad Assam.
“Ngi la kem ïa 4 ngut ki briew haduh mynta. Ngi la kem ïa 2 ngut kiba ngi suba donkti hynnin ka sngi na Hatsingimari – da ki pulit Assam. Ngi la kem sa ïa uwei na Rajabala katba u dang don hapoh bos ban leit sha Guwahati. Ïa uba 4 pat uba la suba donkti ha katei ka kam, la kem na Teporpara, najan khappud Assam – Meghalaya. Ngi dang thwet shuh ïa kiwei kiba donkti ha kane ka jingjia bad ngin ym map ïano-ïano,” la ong u SP ka SWGH, u Vikas Yadav.
Ïa kitei baroh 4 ngut la phah noh sha along na bynta 5 sngi ha kaba ki pulit ki khmih lynti ban ïoh jingtip shuh-shuh ha kine ki sngi ban wan.
