Shillong , Ïaïong 24
Ka Sawmer SC ka la wanphai da ka jingjop kaba nyngkong eh ha ka lympung ïalehkai Shillong Premier League 2023-24 hadien ba pynliem ïa ka Ryntih SC haduh 4-0 kol ha ka Sngi Balang ha First Ground kaba ha 1st Ground, Polo.
Kane ka nam jop ka la wan urlong lyngba u Diego Khriam (27), Lam-shaphrang Kurbah (61), Mack Austin Wanswet (81) bad u Rheadolf N. Doloi (90) na ka bynta ban pynlong ïa kane ka kynhun ban ïoh 3 point.
Kane ka jingshah rem ka la pynlong ïa ka Ryntih ban dang don hapdeng ka jingartatien ban ïoh rung sha ka semi final wat la ka dang ïai sah ha ka kyrdan basaw, namar ka la tam tang 1 point ïa ka Langsning kaba don ha ka kyrdan basan.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Wat la ka la mad ïa ka jingshah rem haduh saw sien kynthih, pynban ha kane ka jingïakhun ka Sawmer ka la pyrshahg ban ïakhun tyngeh bad ka la ïoh ïa ka kabu kaba biang ban pynkhih jar nyngkong eh lyngba u Diego ha ka minit kaba 27. Kane ka shi kol ka la ïai neh haduh kaba kut jong ka kylla step na ka daw ba ka Ryntih kam shym la lah ban pynphai.
Hadien katto-katne por ba la bteng ïa ka jingïakhun jong ka kylla miet, ka Sawmer ka la ïoh biang ban thep ïa ka kol kaba ar lyngbau Lamsha-phrang ha ka minit kaba 61. Da kine ki ar kol ka la nang pynskhem ïa ka Sawmer ban kynjoh sha ka thong.
Kumta shwa ban kut ka jingïalehkai ka Sawmer ka la ïoh ban thep biang sa ar kol lyngba u Mack Austin ha ka minit kaba 81 bad kawei lyngba ka penalty ba ka shut da u Rheadolf ha ka minit kaba 90. Haduh kaba kut ka jingïalehkai ka Ryntih kam shym la lah ban pynphai bad ka la mad ïa ka jingshah rem kaba lai ha kane ka lympung.
Ka Ryntih kaba dang-ïai sah 7 point na ki hynriew sien ïakhun, ka dang-sah sa kawei ka jingïakhun kaba khatduh pyrshah ïa ka Langsning FC kaba la pynsangeh ha ka 16 tarik na ka daw ka jingdap um ka madan ïalehkai hadien ka jingther u ‘lapbah ba jur.
Ka jingïalehkai ha ka sngi Palei kan long hapdeng ka Nongthymmai SC pyrshah ïa ka Lang-sning SC ha ka por 3:15 janmiet.
