Shillong , Ïaïong 24
Ka Rangkynsai CC ka la ïoh jingjop ha ka lympung ïalehkai Super Division Cricket League hadien ba ka la lah ban pynliem noh ïa ka Sputnik CC da 64 run ha ka Sngi Balang ha madan Polo.
Ha kane ka jingïakhun, ka Sputnik kaba la jop ïa kynting pisa, ka la ailad shwa ïa ka Rangkynsai ba kan tied nyngkong ha kaba ka la kamai 248 run bad shah pynhap 9 wiket ha ki 45 over. U Sanvert B Kurkalang u la ïoh ïa ka shiteng spah namar u ïoh 53 run na ki 60 bol bad u Ajay Duhan u la ïoh 41 run na ki 34 bol. Katba u Tarique Siddque u la shim 3 wiket bad ïa ki 2 wiket la khur da u Amiangshu na ka bynta ka Sputnik.
Haba wan beh ïa ka thong, ka Sputnik ka la kamai tang 184 run bad shah pynhap 10 wiket ha ki 38 over. U Amiangshu u la tied 42 run na ki 43 bol bad u Amit Singhania u la ïoh 22 run na ki 28 bol. Katba u Chaman u la shim 4 wiket bad ïa ki 3 wiket la khur da u Adarsh Joshi. Ïa ka nam Player of the Match la khur da u Chaman.
