Nongstoiñ, Ïaïong 24
Ka jingjyllei jong ki nongtuh ha ka thaiñ Nongstoiñ ka la jur bad palat liam kat haduh ba mynsngi mynshai ruh kim salia ne tieng shuh ban lied ïa ki ïing ki sem jong ki briew. Ïa kane la pynshisha lyngba ka jingjia ïa ka ïing jong u Pastor J Wanñiang kaba la jia ha kine ki khyndait sngi ba la dep.
Une Pastor u la ïathuh ba katei ka jingjia shah tuh ka la jia ha ka por ba baroh shi ïing ki dang leit jingïaseng ha kaba la don ki runar kiba la leit lied ïa ka ïing sah jong ki bad ki la ïoh ban rong tuh kumba T. 40,000 ryngkat ki tiar misteri kiba rem dor kynthup ïa ka rynda, ka kor ksam (drill) bad kiwei kiwei kiba utei u Pastor u ju pyndonkam haba trei kum u misteri.
Katei ka jingjia ka la jia ha ka shnong Tiehbah kaba marjan bad ka Civil Hospital Nongstoiñ ha West Khasi Hills District. Ha kaba ïadei bad katei ka jingjia, na ka liang u Pastor u la leit ban ujor da ka ejahar ha thanat Nongstoiñ.
Na ka liang une Pastor u la kyntu ruh ïa ki paidbah ba kin ym mlien ban ieh ïing jah lada leit jingleit bad u la kyntu ruh ban ai jingtip lem ïoh don kiba wan tyrwa die ïa ki tiar misteri ki jong u kiba la shah tuh.
Halor kane ka bynta, haba ïakren bad ki heh pulit ka District ki la ong, na ka liang jong ki pulit ha ryngkat ka VDPCNA ka la pynlong ïa ka Joint Patrolling ban lap ksai ïa ki briew kiba donkti ha ki kam tuh kam thiem kaba la ïai jia khah-khah ha kine ki sngi.
Shuh shuh ki heh pulit ka district ki la kyntu jur ïa ki nongshong shnong ba kin wan shakhmat bad pyntip khlem dier por bad lada ki lap ïa ki nongtuh ha ki shnong ki thaw khnang ba ka aiñ kan trei la ka kam.
Ki la pyntip ruh ba mynta na ka liang ki pulit kin pynkhlaiñ ban pynlong ïa ka jingïaid pahara ha ki ïew bad wat ha ki por miet.
