Shillong, Ïaïong 24
Ka tnad pulit pynïaid kali ka nongbah – Shillong Traffic Police (STP) ka la ïoh lum jan ` 4 lak kum ka kuna na ka jingtalasi ïa ki ar-shaka ha kine ki 3 sngi ba la dep.
“Ha kine ki 3 sngi ba la dep, ngi la ïoh lum jan T.4 lak tang na ka jingtalasi,” la ong u S.P ka tnad pulit pynïaid kali, u K. Prasad.
Ka jingtalasi ïa ki ar-shaka ha kine ki 3 sngi ba la dep ka la long ha ki jaka bapher-bapher jong ka nongbah.
Katkum ka jingïathuh u S.P, u la ong ba ka jingtalasi ka long ban khmih bniah halor ki jingpynkheiñ kyndon kum ka jingtur rak-rak ki ar-shaka ha ki surok, jingñiah thurmur, ka jingpynïeng ha ki jaka bym shah pynïeng, ka jingñiah ar-shaka khlem ka laisen nalor kiwei-kiwei.
Ka tnad ka la peitngor ruh ïa kot ki sla kum ka ‘Registration Certificate’ (RC), ka jingbym siew ïa ka ‘Insurance’, ki ‘Number Plate’ bad ka jingpyndait ïa ki tyndong pynmih tdem sawa.
Ka tnad kan dang ïai bteng bteng ban talasi ïa ki ar-shaka ha kine ki sngi ban wan.
