Shillong, Ïaïong 24
Ka Hynñiewtrep National Youth Front (HNYF) Sengkmie ha ka Sngi Balang ka la leit ban ujor da ka ejahar ha u ophisar ba peit ïa ka thanat Sadar halor ka jingjia ha Them Ïewmawlong ha ka miet 20 tarik u Ïaïong 2024 ha kaba ki jaitbynriew Punjabi kiba shong ba sah ha Them Metor ki la donkti ban thaw jingkulmar ha kawei na ki jaka bam kaba la tip kum ka Saw Aïom Restuarant kaba don ha Ïewduh.
Kum ban shu kdew hangne kitei ki bar jylla ha katei ka miet ki la sdang ban thaw jingkulmar da kaba ki la pyneh ban siew ïa ka bai bam bai dih kaba la poi kat shaduh u pud ka jingïakynroi hapdeng ki nongtrei katei ka dukan bad kitei ki kharmetor. Hadien kata kitei ki Punjabi ki la wan ïalam ruh ïa ka kynhun kaba don haduh 30-50 ngut ki Harijan ban thombor ïa ki paradoh parasnam kiba trei ha katei ka jaka bam bad ban thaw jingkulmar hapoh ka imlang-sahlang.
Haba kren sha ki lad pathai khubor hadien ka jingwan ujor ïa ka ejahar, u Bah Orester Mawlong uba dei u dkhot ka HNYF Sengkmie, u la ong ba kitei ki kharmetor na ka por sha ka por ki la ju mlien ban pyni bor ïa ki paradoh parasnam bad kane ka jingpyni bor jong ki kharmetor ka dei namar ka jingpulom jong ka sorkar jylla ban weng noh shisyndon ïa ki napoh ka Them Ïewmawlong.
“Ngi la ïoh ba kaei-kaei baroh ka dei namar ba ka sorkar ka la pulom bad ka mat Them Metor ka dei ka mat kaba naduh u snem 2018”, la ong u Bah Mawlong.
U Bah Mawlong u la ong ba ym tang ba ka ju don ka huri- hura ha kitei ki thaiñ, hynrei ka long ruh ka jingbym shngaiñ ïa ki kynthei bad ki longkmie ba kin ïaid lyngba katei ka jaka wat lada ka dei ha ka por mynsngi-mynshai ruh namar ba ki kharmetor kiba shong ba sah ha katei ka jaka ki ju leh baheh bha bad pynibor bad ki ju sngew ba ki dei ki trai jaka.
U la ong ba ka jingwan buh jong ka seng ïa ka ejahar kam dei ba kan shu sahkut tang kumto, hynrei kum ka tnad pulit ka dei ban shimkhia ban kem ïa kitei ki kharmetor kiba thmu pynkulmar ha katei ka miet lym kumta ka seng kam banse ban mih hi dalade ban kem ïa kitei ki briew kiba donkti ban thaw jingkulmar.
“Na ka liang ka tnad pulit ka dei ban shimkhia ban ïatreilang bad ngi lym kumta lada kam leh eiei, ngim banse ba kum ka HNYF kan leit hi ban khynra bad kem dalade ïa kito ki khynnah”, la ong u Bah Mawlong.
Shuh shuh u Bah Mawlong u la kyrpad ruh ïa u Myntri ka tnad pohïing ka jylla, u Bah Prestone Tynsong ba kum ka sorkar ka dei ban kham pynkloi ruh ïa ka kam ban pynkynriah noh ïa kitei ki kharmetor napoh katei ka jaka.
“Na ka liang ka seng ngi maham jur ruh ïa kino-kino ki bar jylla kiba wan ban pyni bor khamtam ïa ngi ki Jaitbynriew Hynñiewtrep bad kum ka seng kan nym shong kli-kti hynrei kan ïaid beit shakhmat ban leh ïa kaei kaba donkam ban leh”, la ong u Bah Mawlong.
Na ka liang u Bah Steve R Khyriem, General Secretary, u la ong ba kum kine ki jingjia kiba ju ïai jia na ka por sha ka por ki dei ki jingpynkyndit thiah ïa ka sorkar ba kan leh eiei noh halor kane ka mat kaba sahteng la 6 snem eiei.
“Ngi na ka liang ka seng ngi da maham jur ruh ïa kine ki Punjabi ba kim dei ban leh baheh ha kane ka shnong jong ngi bad katba dang mih ki sngi bad ki snem, ngi ïohi ba ki dang bun bad ka sorkar ka la pynlong khun khadduh ruh ïa kine ki briew bad ki nongap ruh ki la don 24 kynta ha kaba kine ki Punjabi ruh ki la ïoh shongsuk shongsaiñ hynrei shabar pat ki la leh baheh”, la ong u Bah Khyriem.
