Jowai, Ïaïong 24
Ka War Jaiñtia Students’ Union (WJSU) ha ka Sngi Balang ka la leit ban ujor halor ar tylli ki mat, kawei ha kaba ïadei bad ka bording bad kawei pat halor ka jingjot rathai ka jingkieng ïaid kali lyngba ka surok Muktapur Borghat kaba don ha ka thaiñ khappud Bangladesh.
Halor kine ar tylli ki mat, ka WJSU ka la ujor ha u Executive Engineer ka tnat MePDCL, Jowai bad tnat PWD (R), Jowai South Division, Jowai ba la ïalam da u Publicity Secretary Eversest Langstang ryngkat ki katto kattne ngut ki dkhot nongkitkam.
Ka seng ha ka jingujor ka la ong, ba ka jinglip bording ha ka thaiñ War Jaiñtia ka neh da ki kynta kumjuh da ki sngi bad kane ka la ktah ïa ki paidbah ka thaiñ.
Ka seng ka pynpaw ruh ka jinglyngngoh ïa ka tnat MePDCL namar tang shu slap ruh ka la pynduh bording wat haba khlem don kano-kano ka jingpynthut na ka mariang ïa ki post electric ne ki line electric katba ka jingsiew bording pat ka nang kiew ar shah lai shah.
Ka seng ka kyntu ïa ka MePDCL ban pynbiang bording hapoh ka thaiñ lym kumta ka seng kan shim da kawei ka sienjam khnang ba ki paid ka thaiñ kin ïoh jingmyntoi kumba ïoh lang kiwei.
Ha kaba ïadei bad ka jingkieng, ka seng ka la ai por shi taïew ïa ka tnat PWD (R), Jowai South Division, Jowai ban maramot ïa katei ka jingkieng naduh ka tarik ba ki ïohpdiang ïa ka jingthoh ujor lym kumta ka seng kan leh da kaba tyngeh na ka bynta ban pynurlong ïa ki jingdonkam u paidbah.
