Shillong, Ïaïong 25
Ka jingshit kyrang jong ka suiñ bneng bad ka jingtyrkhong ka la pynlong ïa ka ding kaba la kem ha ki bynta ka khlaw Lumparing ha ka Sngi Palei ban pur sted bad bam naphang ïa kane ka khlaw.
Ka jingklang ka ding ka la long kaba shyrkhei bad ka la bam ïa kiba bun ki bynta jong kane ka khlaw kaba don bun ki tyllong umbam-umdih ne ba la tip kum ka khlaw Catchment Area ka nongbah Shillong.
Ka jingpluh kane ka khlaw ba don ki tyllong umbam-umdih jong kiba bun ki shnong ha Sor Shillong, ka la jia naduh ka por 10 baje eiei mynstep. La ïathuh ruh ba ka ding ka la pur sted namar ka jingjur jong ka lyer bad bam naphang naduh ka thaiñ Lumparing-Malki shaduh ka thaiñ Motinagar.
Kumta la suba jur ba ka jingkem ding jong kane ka khlaw ka lah ban dei na kiba thang khlaw ne phliah ding.
Lah ban pynkynmaw ba na ka liang ki bor pynïaid district kumjuh ruh ki Rangbah Shnong ki la ju pynmih ki jingmaham bym bit ban thang khlaw satia khamtam lei ha kum kane ka por ba jur ka lyer.
Ïa kane ka jingpluh la lap nyngkong da ki nongtrei ka tnat Khlaw kiba khmih ïa kane ka khlaw Catchment Area, kiba la ïa mih ban ïakhun ïa ka ding hynrei namar ka jingpyrhut jong ka lyer, kine ki nongtrei kim shym la lah satia ban tehlakam.
Namar ka jingïohi ïa ka jingnang pur sted jong ka ding bad kumta la pyntip noh mar-mar sha ka tnat Pynlip Ding ka Jylla, kaba la phah ïa ki kali pynlip ding bran-bran sha katei ka khlaw ban ïakhun ïa ka ding.
Kumjuh ruh wat ki paidbah nongshong shnong ka thaiñ Khliehshnong Malki, Risa Colony bad Motinagar ki la ïamih ban ïarap lem ïa ki nongtrei ka tnat Khlaw bad ki pulit pynlip ding ban tem ïa ka ding.
