Shillong, Ïaïong 25
Ka Sports Cell jong ka Khasi Students’ Union (KSU) ka pynpaw ïa ka jingkyndit hadien ba ka la ïoh jingtip ba ka tnat Sports & Youth Affairs jong ka Sorkar jylla ka la jied haduh 7 ngut ki nongïalehkai basketball ki bym dei ki trai jylla napdeng ki 12 ngut ki ban mihkhmat ïa ka Jylla ha ka lympung ïalehkai Basketball National School Games ka ban long ha Haryana.
Kat kum ka kyrwoh ba la pyllait da u samla Eric A. Nongkynrih, Chairman ka Sports Cell jong ka seng KSU, la ong ba ha ka thup ki nongïalehkai la shah jied tang 5 ngut ki trai jylla, katba 7 ngut ki dei kiba nabar, kata ki bym dei ki Khasi ne Garo.
Kane ka jingleh shiliang khmat ka Sorkar Jylla ïa ki khynnah ïalehkai Khasi ka wanrah ïa ka jingkylli, hato ka sorkar Meghalaya ka dei ban kyntiew ïa ki Khasi (Khynriam, Pnar, Bhoi, War, Maram & Lyngngam) bad Garo ne ban ai rynsan ha ka ban kyntiew ïa kiwei pat ki jaidbynriew bym dei trai shnong?
Ka Sports Cell jong ka KSU ka pynrem jur ïa kane ka jingleh beiñ bad jingbym kheiñ snep ka sorkar Meghalaya ïa ki khynnah Khasi kiba don sap bad thrang ban ïalehkai basketball. Ka KSU ka buh jingkylli, hato ka Meghalaya ka rhah tang ban ïoh ka nam jop da kaba wanrah da ki nongïalehkai ba nabar ne ka thrang ban kyntiew ïa ki khynnah ka Jylla khnang ba kin kiew shuh shuh ha ki jingïalehkai bapher bapher?
“Kane ka jingleh thurmur ka sorkar kan pynduh mynsiem bad pynduh lad ïa bun ngut ki samla kiba angnud bad don sap ban ïalehkai ha ka basketball,” la ong ka kyrwoh.
Kyntang ïa wai ka Sports Cell ka kyntu ïa ki khynnah Khasi ban ym duh jingkyrmen wat haba la shah leh meinah ha ka Sorkar Jylla namar ka seng kan ïai wad ki lad ki lynti ban ai rynsan ïa ki bad kumjuh ruh ban peit pyrman ba kin ym duh ïa ka hok ka jong ki na ka sorkar.
