Shillong, Ïaïong 25
U Myntri Sorkar bad nongïalam ka BJP, u Bah A.L Hek, ha ka Sngi Palei u la ong ba un ïakren ha ka jingïalang jong ka sorkar Meghalaya Democratic Alliance (MDA) ha kaba ïadei bad ka jinglong-jingman ka shongsuk- shongsaiñ ha jylla.
Haba pynpaw ïa ka jingsngewkhia halor ka jingsynjor ka jinglong-jingman khamtam ha kaba ïadei bad ka jingshah leh be-ijot ar ngut ha South West Garo Hills bad kawei ha East Khasi Hills, u Bah Hek u la ong ba ka kamram jong ka sorkar ka long ban pyntreikam ïa ka aiñ.
“Ngin hap ban pyntreikam beit ïa ka aiñ la ka long sa kumno-kumno ruh. Baroh ki nongshong shnong ki long kumjuh hakhmat jong ka sorkar,” u la ong. Nalorkata, u la ong ba mano-mano kiba donkti ha ki kam be-aiñ ki dei ban shah pynshitom.
U Bah Hek u la ïathuh ba un sa ïakren ha ka jingïalang jong ka MDA bad kumjuh ruh ha ka jingïakynduh jong ka Kynhun Myntri (Cabinet) halor kitei ki jingjia bad ka jinglong-jingman ha ka jylla.
“Kam dei tang ka jingkitkhlieh jong u Myntri Rangbah ne Symbud Myntri Rangbah, hynrei ngi ruh ngi don lang ka jingkitkhlieh. Ngin ïakren beit ïa kitei ki mat ha ka jingïalang jong ka MDA ne Kynhun Myntri. Balei ngin sngap jar? Ngin hap ban ïakren na ka bynta ka jingbha ka jylla,” u la bynrap.
Lah ban kdew ba ki la don artylli ki jingjia shah batbor bad leh be-ijot jong ki khynnah rit ha South West Garo Hills da ki runar kiba la wan na Assam. Na ka liang ki pulit ki la ïoh ban kem saw ngut ki runar kiba dei na Assam ha kaba ïadei bad kane ka jingjia.
Ka la don ruh sa kawei pat ka jingjia ha kaba kawei ka dur khih jong ka jingshah leh be-ijot jong kawei ka samla ha Shillong ka saphriang. La ong ba kane ka dei ka jingjia ha u Nailur 2023 katba ka dur khih ka la saphriang dang katto-katne sngi mynta.
