Ranchi, ïaïong:
Ka sorkar Jharkhand ha ka Sngi Balang ka la pyntreikam pyrkhing bad phikir bha ha kaba ïadei bad ka jingïoh khubor halor ka jingdon jong ka jingpang Bird Flu ïa kaba la tip ruh kum ka Avian Flu, ha ka jylla ha ki jaka ri jingri ha Ranchi.
Ki la don kumba 4000 tylli ki sim, kynthup ki syiar kiba la shah pynïakhlad la kajong bad da ki spah tylli ki pylleng ki la shah pynpait noh hadien ba ïa kane ka jingpang jong ki sim ne ki syiar la pynshisha ba ka la ktah ïa ki jingri ha Regional Poultry Farm kaba don ha ka shnong Hotwar kaba don ha ka nongbah jong ka jylla, la ïathuh ki heh ba dei khmih.
Ïa ka jingdie ïa ki syiar, ki sim bad ki pylleng la khang noh ha ka jaka kaba jngai kumba 1-kilometre na ka jaka ba la shah ktah ha kane ka jingpang Flu.
Ka jingpynïakhlad ïa ki jingri ha Regional Poultry Farm yn sa leh ha kine ki khyndiat sngi ban wan bad yn sa leh ïa kane katkum ka jingstad saïan ba mynta, la ong ka hukum ba la batai shai shaphang ki Standard Operating Procedures, ba la wanrah da ka sorkar, la ong ka jingthoh. Ki heh ba dei khmih ki la hukum ba la dei ban pynlong ïa ka jingkhmih bniah ha ki jaka kiba don hapoh ka jingngai kaba 1 km na ka jaka ba la sdang kane ka jingpang bad ban ïaid shakhmat ha kaba ïadei bad ka jingpynïakhlad ïa ki jingri.
Ki la shah bthah ruh ba la dei ban buh dak ïa ki jaka kiba jngai 10 km bad ban kdew shai ba ki dei ki jaka ba la shah pyntreikam pyrkhing.
“Kan sa don ka jingkhang ha kaba ïadei bad ka jingthied ne ka jingdie ïa kine ki jingri tad haduh ban da pynbna da kumwei pat. Ka kynhun jong ki bor pynïaid distrik ki la leit shaman ki thliew ïing ha ki jaka kiba don ha ka jingjngai kaba 1km jong ka jaka ba la shah ktah jur bad pynlong ka jingkhmih bniah ïa ki sim, ki syiar, ki pylleng bad kiwei pat. Ki ïing, ki dukan, ki kali kit jingkit bad kiwei pat kin sa ïatreilang bad ka kynhun khmih bniah bad pyntikna ba kin ai ka jingtip kaba bniah shaphang kine ki jingri, ki pylleng bad kiwei pat, bad ban aiti sha ki na ka bynta ban pynïakhlad ïa ki jingri,” la ong ka hukum.
Ka Animal Husbandry Department hapoh ka jylla ka la kyntu ïa ki briew ba ki la dei ban pyntip mar mar sha ki bor ba dei khmih lada jia ba ki ïohi ïa ka jingïap jong ki sim ne ki syiar.
Ka Union Ministry of Fisheries, Animal Husbandry, bad ka Dairying ki la bthah ïa ka jylla ba ka la dei ban shim ïa ki sienjam na ka bynta ban tehlakam halor kane ka jingsaphriang jong kane ka jingpang.
