Shillong, Ïaïong 25
Ka Sohra Cluster (A) bad ka Mawsynram Cluster ki la jam sha ka final ha ka lympung ïalehkai (L) Benjamin Diengdoh Memorial U-15 Boys Inter Cluster Cricket Tournament 2024 ba la pynïaid da ka East Khasi Hills Cricket Association hadien ba ki la ïoh jingjop ha ka sngi Palei.
Ha ka jingïakhun semi final kaba nyngkong kaba la long ha madan Shortimai Syiem Stadium kaba ha Smit, ka Sohra Cluster (A) ka la pynliem noh ïa ka Sohra Cluster (B) da 10 wiket. Ka Sohra Cluster (A) kaba la jop ïa ka kynting pisa, ka la ailad shwa ïa ka Sohra Cluster (B) ba kan tied nyngkong ha kaba ka la kamai 98 run bad shah pynhap 10 wiket ha ki 19.2 over. U Donborlang Lyngdoh u la tied 20 run na ki 18 bol. Katba u Othaniel Lyndoh Nonglait u la shim 3 wiket na ka bynta ka Sohra Cluster (A).
Haba wan shimti ïa ka pali kaba ar, ka Sohra Cluster (A) ka la lah ban kynjoh sha ka thong da kaba kamai 99 run ha ki 11.2 over. U Ryan Emi Swer u la tied 49 run na ki 41 bol bad u la ïohpdiang ruh ïa ka nam Man of the Match.
Haba phai sha ka jingïakhun semi final kaba ar, ka Mawsynram Cluster ka la jop da 9 wiket ïa ka STCC Pongtung Cluster. Ha kane ka jingïakhun ka STCC Pongtung Cluster ka la kam trai ban tied nyngkong ha kaba ka la kamai 43 run bad shah pynhap 8 wiket ha ki 20 over. U Mewanshailang Khongmawloh u la tied 4 run na ki 15 bol. Katba u Bansan Kynter u la shim 4 wiket na ka bynta ka Mawsynram Cluster.
Haba wan shimti ïa ka pali kaba ar, ka Mawsyn-ram Cluster ka la lah ban kynjoh sha ka thong da kaba kamai 44 run bad shah pynhap tang shi wiket ha ki 6 over. U Pynkhraw Jomati u la tied 21 run na ki 12 bol. Katba u Mebanlambha Lyng-shiang u la shim 1 wiket na ka bynta ka STCC Pongtung. Ïa ka nam Man of the Match la khur da u Bansan Kynter.
Lyngba kine ki nam jop, ka Sohra Cluster (A) bad ka Mawsynram Cluster kin pynkhreh ban ïaknieh ïa ka nam lahduh ha ka jingïakhun final ka ban long ha ka 1 tarik u Jymmang.
