Nongpoh, Ïaïong:
Ki bor pynïaid jong ka koit ka khiah ha Ri Bhoi District lyngba ka shlem treikam jong ka District Medical & Health Officer (DMHO), ha ka Sngi Balang ki la ïoh ban sdang noh ïa ka jingai dawai wieh sha ki khynnah ha ki skul bad ki anganwadi centre jong ka Ri Bhoi District.
Ïa kane ka jingai dawai wieh na ka bynta ki khynnah kiba hap hapoh ka rta 1 snem haduh 19 snem ka rta, la sdang nyngkong ha ka skul Jubilee Presbyterian Secondary School, Mawpdang, Saiden kum shi bynta na ka jingplie paidbah ïa ka National Deworming Day 2024.
Ha kane ka sngi la wan ban ïadon ryngkat da ka Kong G Warjri, Health Education Officer ka Ri Bhoi District lem bad kiwei kiwei ki nongtrei na ka tnat ka koit ka khiah ka District, ki nonghikai lem bad ki khynnah skul jong ka Jubilee Presbyterian Secondary School.
Haba kren ha kane ka sngi, ka Kong G Warjri ka la ong ba ka jingdih ïa ka dawai wieh na ka bynta ki khynnah kiba hap hapoh ka rta kaba 1 snem haduh 19 snem ka rta ka long kaba donkam bad kaba kongsan ban lait na ki wieh bad kiwei kiwei ki jingpang da kaba pyntip ba ka jingai ïa ka dawai wieh la ju pynlong ar sien ha ka shisnem, kata ha u bnai Ïaïong bad ha u bnai Risaw.
