![SPL 2023: Nang jan ka Langsning ban rung semi final naba pynliem ïa ka Nongthymmai Nongthymmai-(red-blue)-and-](https://unongsainhima.com/wp-content/uploads/2024/04/Nongthymmai-red-blue-and--720x460.jpg)
Shillong, Ïaïong 25
Ki ar kol ba la thep da u Sheen Stevenson Soh-ktung ki la biang pura ïa ka Langsning FC ban khur ïa ka jingjop ha ka lympung ïalehkai Shillong Premier League, hadien ba ka la lah ban pynliem noh ïa ka Nongthymmai SC da 5-1 kol ha ka sngi Palei ha SSA Stadium kaba ha First Ground, Polo.
Kane ka nam jop ka la pynlong ïa kane ka kynhun hapoh ka jingïalam u Bah Hering Shangpliang ban jam sha ka kyrdan basaw bad ka la don jingkyrmen ban ïoh rung sha ka semi final.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Watla ka Langsning ka la lah ban pynliem ïa ka Nangkiew Irat ha ka jingïalehkai ba la lah, hynrei ha kane ka jingïakhun ka la shem jingeh ban thep kol. Haduh kaba kut jong ka kylla step kine ki kynhun kim shym la lah ban thep kol.
Dei hadien shiphew minit ba la bteng ïa ka jingïakhun jong ka kylla miet ba ka Langsning ka la ïoh ban pynkhih jar nyngkong eh lyngba u Sheenstevenson. Kane ka shi kol ka la nangpynïoh mynsien ïa kane ka kynhun ha kaba ka la ïoh ban thep biang lai kol hapoh 12 minit. Ïa kine la thep da u Nelson Rymbai ha ka minit kaba 60, kumjuh u Kitboklang Pale (65) bad u Dawandappura B. Pathaw (71).
Hadien katto katne por ka Nongthymmai ka la pyrshang ban ïakhun tyngeh bad ka la lah ban pynphai kylla shi kol lyngba u Andyson Lapang ha ka minit kaba 78. Watla kane ka kynhun ka la pyrshang ban pynphai, hynrei kam shym la lah shuh ban thep kol. Hashwa ban wai u Sheen u la thep biang ïa ka kol kaba ar ka jong u na ka bynta ban pynlong ïa ka Langsning ban khur syndon ïa ka jingjop kaba lai ha kane ka lympung.
Lyngba kane ka jingjop ka Langsning kaba la jam sha ka kyrdan basaw, ka la ïaryngkat mar 9 point bad ka Shillong Lajong (kaba don ha ka kyrdan balai), katba ka Nongthymmai ka dangïai sah ha ka kyrdan ba hynriew bad 3 point.
Ka jingïalehkai ha ka sngi Thohdieng kan long hapdeng ka Rangda -jied United FC (15 point) pyrshah ïa ka Mawlai SC (13 point) ha ka por 3:15 janmiet.