Khliehriat, Ïaïong 26
Ka lympung ïalehkai ‘District Level Inter School Athletic Meet 2024’ ba lai sngi lynter ba la pynïaid da ka shlem treikam jong ka District Sports Officer (DSO), East Jaiñtia Hills District ryngkat ka jingïatreilang ka East Jaiñtia District Sports Association (EJDSA) ka la jam sha ka sngi kaba ar ha madan Teilang Playground Dkhiah kaba ha East Jaiñtia Hills District.
Ïa kane ka lympung la wan ban plied a ka Additional Deputy Com-missioner ka Kong J.U. Kharpuri (MCS), East Jaiñtia Hills District ha ka jingdonlang ka District Sports Officer, East Jaiñtia Hills District Kong Stephanie. M. Rapsang, ki dkhot nongkitkam ka EJDSA kumjuh ki nongkitkam ka WJDSA, ki principal bad nonghikai na ki skul bapher bapher ka district.
Ha kane ka lympung ka ban kut ha ka sngi Saitjaiñ, la wan shim bynta da ki 29 tylli ki skul ha ka kyrdan ïalehkai Under-14, Under-16 bad Under-18 jong ki khynnah shynrang bad kynthei.
Ha ka sngi Thohdieng, la lah ban pynlong ïa ki jingïakop mareh kum ka 2000m, 300m, Shotput bad High Jump.
Ha ka 2000m jong ka kyrdan Under-16 ki kynthei, la jop da ka Thaibiang Phawa na Sein Raid Branch U.P School, Mukhaïalong kaba la lah ban pyndep ha ki 8:33.0 sekhon, ba-ar Risaka Phawa na Sein Jait Tuber HSS, Tuberkmai Shnong ha ki 8:57.1 sekhon bad ba-lai la khur da ka Sankini Phawa na San Shnong Secondary School Mukhaialong ha ki 9.23.9 sekhon.
Katba na ka liang ki shynrang la jop da u Deibormi Phawa na Sein Jait Tuber Higher Secondary School, Tuberkhai Shnong uba la lah ban pyndep ha ki 6:41.7 sekhon, ba-ar u Heibor-meki Sumer na ka Ambrose Memorial Secondary School, Khliehriat West ha ki 6:47.2 sekhon bad ba-lai u Soomi Phawa na ka Nongsyntoiñ Upper Primary School ha ki 6:50.6 sekhon.
