Shillong, Ïaïong:
U MLA barim ka Mylliem, Bah Hamlet Dohling uba long mynta kum u nongaibuit ïa u Myntri Rangbah ka sorkar Jylla, u la ong ba kito ki ‘riew rangbah kiba kynnoh ïa ki Rangbah Shnong kim lah treikam ka dei ka jingkynnoh kaba bakla namar ki Rangbah Shnong khlem ka tulop ki la trei shitom khamtam ha ka por COVID-19.
Ïa kine ki kyntien u Bah Hamlet u la kren ha jingïalang dap 25 snem ka shnong Laitmynsaw kaba don ha syndah ka Mattilang Park, Mylliem constituency kaba la long ha ka Sngi Palei.
U Bah Hamlet u la ïathuh ba ki don 36 tylli ki shnong hapoh ka Mylliem constituency, bad baroh ki shnong u la pyrshang ban ïarap da kaba wanrah ïa ki kam pynroi naduh ki ïing skul, ki dorbar hall, ki umbam bad kiwei.
“Kam long kaba suk ba ngan pyndap lut ïa baroh 36 tylli ki shnong hapoh san snem” u la ong.
Nalor nangta, u la kyntu ïa ka shnong ba kim dei ban klet ïa ki ‘riew rangbah kiba la noh synñiang naduh u snem 1999 ba la wan seng shnong.
Ha kajuh ka por u la ai burom ïa ki nongïalam shnong namar ki don ka jingkitkhlieh ïa la ka jong ka shnong ban kit ban bah khlem ka jingsiew tulop.
U la ïaroh ïa ka shnong Laitmynsaw kaba don 266 ngut nongshong shnong kaba dei pat kaba nyngkong ban pyndep ïa ka skhim sam um na ka JJM hapoh ka Mylliem constituency.
Ha kane ka jingïalang la ïoh ka jingkren na u Pa’iem Ainam Syiem u Syiem ka Hima Mylliem, u Rangbah Shnong Nongpyiur Bah Badonbok Dkhar, Rangbah Shnong Laitmynsaw Bah I. Dkhar, Bah A. Nongkynrih Rangbah Shnong Myrkhan ryngkat ka jingïadonlang ki longkmie-longkpa bad ki samla.
