Gaza, ïaïong:
U nongialam ba hakhlieh jong ka kynhun lehnoh Hamas, ha ka Sngi Palei u la ong ba ka Israel da lei-lei ruh kan nym lah ban pyn-urlong ia ka jingthmu jongka ban pynliem ia ki lehnoh Hamas lane ban pyllait ia kito kiba ka Hamas ka rahbor baroh da kaba leit ban hiar thma jur hapoh Rafah jong ka nongbah Gaza.
Namar u la ong ba watla ka Israel ka leit ban hiar thma bad pyn-um ia ka Rafah baroh kawei ruh, kin nym lah ban ioh ia kaei kaba ki thmu. Ia kane, u Ghazi Hamad u la kren hapdeng haba ai jingkren sha ki lad pathai khubor lyngba ka phone sha Qatar.
U Hamad u la ong ruh ba ka Israel ka la pynlut por haduh 7 bnai ban leit hiar thma ia ka Gaza bad ka la leit pynjulor bad pyn-um na baroh ki bynta jong katei ka nongbah, hynrei haduh mynta kam pat lah ban poi sha katei ka thong ba ka kwah bad kam pat ioh ruh ban pyllait im wat tang iwei ruh napdeng kito kiba ka Hamas ka la rahbor ha u Risaw jong u snem ba la leit.
Namar kumba la iohi ia ki khubor bad ka jinglong- jingman na ka thma ka Israel bad ki lehnoh Hamas ha kine ki sngi, la iohi ba ka Israel ka la pynkhreh ia ki shipai jongka ban leit thombor bad leit hiar thma tyngeh ia katei ka thaiñ Rafah jong ka nongbah Gaza, watla ka tip ba kumba 1.5 Million ngut ki paidbah nongshong shnong ka Gaza ki don ha katei ka bynta.
Kumta, ki la mih ruh ki jing kyntu na kiwei pat ki tnat bad ri bapher kiba la kyntu ia ki Israel ba kam dei ban leit hiar thma ia katei ka bynta jong ka Gaza namar hangtei ki paidbah ki shong phet rieh naduh ba sdang jong ka thma ka Israel bad ki Hamas.
Shuh shuh ruh la ong ba ka Qatar, ka United States bad ka Egypt, ki la nang iaid ha ka jingiakren ban wanrah ia ka jingiasuk hapdeng ka Israel bad ka Hamas bad kumjuh ruh ban ioh pyllait noh ia baroh kitei kiba la shah rahbor ha ki lehnoh Hamas naduh ba sdang jong ka thma ha u Risaw jong u snem ba la leit.
Shuh shuh ruh la ong ba ka kynhun Myntri na Egypt ka la pynbeit ban leit sha Israel ha ka Sngi Thohdieng ban ioh iakren halor kitei ki mat ba kongsan naka bynta ka bha- ka miat lang jong baroh.
U Lamphang ka Israel- u David Mencer, ha ka Sngi Palei u la iathuh ba ka Israel ha kane ka por ka dang pyrkhat bad shong jingialang halor kumno ban pynliem ia ka kynhun ba khatduh jong ka kynhun lehnoh Hamas kaba don ha katei ka bynta jong ka nongbah Gaza, shuwa ba ki shipai ka Israel kin ioh ban synshar hi noh ia katei ka nongbah baroh kawei.
