Ka jinglap jong ka Hynñiewtrep Youth Council (HYC) ïa ka jingdona ki bar jylla kiba sah ha ka jaka ba don shadien jong ka Them Metor ka la pyni pyrthei sa ïa kawei pat ka jaka kaba ym don ba tip kumno ki briew ki ïoh rung ïoh mih bad shong bad sah katba ki mon hapdeng ka jingjyllei jong ka jaboh jabaiñ bad jingkhapngiah. Ka HYC ka la lap ba kiba sah ha kane ka jaka, ki la shong ha ki ïing kiba rit bad ba la tap da ka plastik bad kaba sngewlyngngoh ka long ba ki sah haduh kumba 20 bad 30 ngut ha kawei kawei ka ïing rit bad ha kane ka la lap ba ki la don haduh palat 80 tylli ki ïing ba la pynïeng da kine ki bar jylla. Nalor ka jingleh sih bad jingbret pathar ïa ki jaboh, la lap ruh ba ki briew kiba shong ba sah ha kane ka jaka ki ring ïa ka bording na kawei ka ïing kaba la ïoh bording ban pyndonkam lang ha kine baroh ki ïing. Kane ka rukom pyndonkam ïa ka bording ka long kaba be-aiñ bad na ka liang ka Meghalaya Energy Corporation Limited (MeECL) ka la dep ban leit ot noh ïa ki sainar tan bording ha katei ka jaka.
Ka HYC ka la leit ïakynduh ïa ki bor jong ka Shillong Cantonment Board (SCB), kaba dei jong ka tnat Ïada Ri (Defence) jong ka Sorkar Pdeng, hynrei la sngewthuh ba ka shlem treikam kaba peit ïa katei ka jaka shadien jong ka Them Metor ka dei ka Defence Estate Office (DEO) kaba don shaduh Guwahati. Ka sorkar Meghalaya ka dei ban ïakren bad ka tnat Ïada Ri bad kumjuh ruh ka DEO ban kylli ha kano ka dur la ai jaka sah ïa kitei ki briew ha katei ka jaka. Watla kam dei satia ka khyndew jong ka sorkar jylla, hynrei dei ban buh jingkylli namar ngi hap ban peit na ka liang ka jingïoh mon jong ki briew ban wan rung sha katei ka jaka bad pynlong jaka sah khlem da don ka jingpeitngor kaba thikna.
Balei ba ka donkam ïa ka sorkar jylla ba kan tuklar ka long ba ka jingleit hiar jurip kynsan jong ka HYC ka la long hadien ba ka la ïoh bun ki jingujor na kiba bun ki nongleit nongwan ba tang shu la kem dum ka suiñ bneng, ki briew kiba sah ha kane ka jaka ki la ïamih ban sdang ka jingïadie drok bad ban leh ïa kiba bun ki kam sniew. Nalorkata, ka HYC ka la lap ba kiba shong ba sah kim dei satia ki nongshong shnong jong kane ka jylla naba kim don wat tang ïa ka EPIC, bad ki la wan na kiwei ki jylla jong ka ri India. Haduh kane ka jingmatlah jong kita ki bor ka Sorkar Pdeng? Ka HYC ka la pynpaw ruh ïa ka jingsngewkhia ba kitei ki briew kim don ïa ki kot ki sla bad lada ki leh ïa ki kam runar, la thikna ba ki pulit kin ym lah ban wad ïa ki. Kaei ka ban jia haba kumta lada mih kano-kano ka jingïakynad ne ka jingïashoh ïadat? Kam long da lei-lei kaba shngaiñ ban shu sngap mynthi namar ngim lah ban tip kaei ka ban jia hadien habud khamtam ba ki dei ki briew ki bym don ïa ki kot ki sla.
Sa kawei ruh ka jinglap jong ka HYC ka long ba ha ka por ba ki dkhot ki la leit rung sha katei ka jaka, kito kiba ju mlien ban die drok ki la phet krad. Namarkata, ka jingma ba katei ka jaka bad ki nongshong nongsah ki buh ïa kiwei kam dei kaba kai lane kaba sting. Shisien ba la dei ka ktem ki nongdie drok, ngi la sngewthuh lypa ïa ki kam sniew kiba mih bad kiba lah ban mih na katei ka jaka bad saphriang sha kiwei pat. Ki kam sniew kam smeh kum ka tuh ka thiem, lute, jingpynïap briew bad kumta ter-ter ki lah ban kha roi lada ym shimkhia noh mynta. Nalorkata, ka HYC ka la lap ba ki briew kiba sah ha katei ka jaka ki dei kiba shu im da kaba tam bilor, tam tin jot katba ki don pat ki shynrang kiba trei bylla, trei misteri bad don ruh kiba kam ba ki dei kiba trei ha Municipal bad ha ki dukan.
Ka Shillong kam dei ka jaka theh ñiut ha kaba mano-mano ki lah ban shu wan shong wan sah katba ki mon khlem da don ki kot ki sla bad ki jingtip kiba thikna. Ka sorkar jylla kam lah ban phai da lyngkdong halor kine kiei-kiei watla ka lah ban ong ba ka khyndew kam dei ka jong ka. Ngim dei ban ap ïa kata. Mar-mar ka dei ban don ka jingïakren bad ki bor ka SCB bad DEO bad kumjuh ruh ka tnat Ïada Ri bad ban shim lang ïa ki sienjam ba dei ban shim khnang ban pynthikna ba kiba sah be-aiñ ki dei ban mih syndon na katei ka jaka bad kumjuh ruh na ka jylla bad leit phai biang sha ki shnong ki thaw ba ki wan. Ka sorkar jylla ka dei ban shim nuksa na ka Them Ïew Mawlong kaba la heh suki pa suki haduh ba ka la buh jingeh ban weng ïa kito kiba la shong la sah be-aiñ. Balei ngin ap haduh ban da heh da san katei ka jaka ba shong da ki briew ki bym I thikna? Ha kaba khatduh, lada ailad kumne, ka ban ïakynduh jingeh kan dei ka sorkar jylla. Ka SCB bad DEO ki lah ban thet kti lada mih kaei-kaei hadien habud.
