Shillong, Ïaïong:
Ka NEEPCO Tribal Employees’ Welfare Association (NTEWA) ryngkat bad ka NEEPCO Women Welfare Association (NWWA) haba pynrem jur, ki la pynpaw ïa ka jingsngewkhia halor ka jingkawang petrol bom da ki runar ïa ka kali jong ki pulit kaba synran ïa ka kali u heh ka NEEPCO.
Une u heh ka NEEPCO ïa uba la synran da ki pulit u dei u Director (Personnel) Maj Gen RK Jha, AVSM (Retd.). Kane ka jingjia ka la jia ha ka miet Sngi Balang ha ka thaiñ Demthring, kaba hap hapoh ka thanat Madanrting.
Katkum ka tyllong khubor ba la ïohlum la ïathuh ba kane ka la jia ha ka por kumba 7:25 janmiet katba ka kali pulit kaba synran ïa u Maj. Genl. Jha uba dang mih na shlem treikam ban leit sha la ïing sah kaba don ha Laitkor.
La ïathuh ba kane ka kali ba la shah kawang petrol bom ka dei ka ‘Thar’ kaba shong da ki pulit kiba synran ïa u Director (Personnel) ka NEEPCO. Kumta mar-mar ki briew kiba don hapoh kane ka kali ki la kloi ban pynlip noh ïa ka ding.
