Washington, ïaïong:
Katba ki jingiakhih paidbah ki nang mih ha kiba bun ki skulbah ha kylleng ka United States, ki bor pyniaid ka US ki la iathuh ba ha ka Sngi Palei ki la ioh bat ia 93 ngut kiba ïadon bynta ha kitei ki jingiakhih paidbah ha ka University of Southern California.
Kumta, ki pulit ka Los Angeles Police Department ha katei ka sngi ki la pyntip ba ki la ioh bat noh ia 93 ngut kiba ïadon bynta ban pynheh ia katei ka jing-iakhih ha ka skul bah University of Southern California ha ka Sngi Balang.
Ki pulit ki la ong ba katei ka jaka pule ka dei kaba kyrpang bad ka bym ju shah ia ki briew nabar ba kin leit rung be-aiñ. Namarkata, ki pulit ki la bat noh ïa kitei kiba ïadon bynta ha katei ka jingïakhih paidbah kaba la pynlong ha phyllaw jong katei ka skul-bah namar la ong ba ka long ruh kawei na ka jingpynkheiñ ia ki aiñ bad ki kyndon ba la buh jong katei ka jaka pule.
Shuh shuh ruh la ong ba uwei u briew u la shah bat noh namar ka jing pyndonkam ia ki tiar pynmynsaw ha katei ka jingjia.
Wat la katta, ym shym la ioh jingtip ban don ki nongïakhih ne ki pulit ki ban mynsaw na katei ka jingiakhih bad ka jingkulmar kaba la mih ha katei ka sngi.
Kumjuh ruh la ong ba ka tnat Public Safety jong ka USC ka la bthah ia kitei ki paidbah kiba ialum ha Alumni Park ha ka Sngi Balang ba ki dei ban mih noh na katei ka jaka namar kam long kaba bit ia ki ban leit rung bad pynkheiñ ia ki aiñ jong katei ka skul-bah bad la maham ruh ba lada kim kohnguh, ki bor pyniaid kin phah kem ia kitei kiba ïadon bynta baroh. Hynrei la ong ba kitei ki paidbah kim shym la pynsngap ia kitei ki jingmaham bad ki nud ban iaid lait ia kitei ki kyndon ba la buh. Namarkata, ki pulit kim banse ban kem bad leh ia kaba donkam namar ki la pynkheiñ ia ki aiñ bad ka jingmaham jong ki bor ba halor.
Ki heh jong katei ka skul-bah, ki iathuh ba ka jingkulmar ka la sdang ban mih naduh ba kitei ki nongialam jong katei ka jingiakhih paidbah kim shym treh ban kynriah na katei ka jaka hynrei ki leit ban shna ia ki iing-dara bad ki leit rah ruh ia kiwei-kiwei ki tiar ba kin ioh ban shong ha katei ka jaka ban pynlong jingiakhih kumba ki la thmu.
Hadien kane ka jingjia, katei ka skul-bah ka la khang khyrdep noh syndon ia katei ka jaka pule ha katei hi ka jan-miet katba ka LAPD ka dang leit ban kem bad rah noh ia kitei ki nongïakhih baroh.
Haba iadei bad kane, la ong ba 30 ngut kiwei pat ki nongïakhih na ka University of Texas ki la shah bat noh hadien ba ki la leh ia katei hi kajuh ka kam pynkheiñ aiñ da kaba leit ban pynlong jingiakhih ha phyllaw jong katei ka skul-bah bad kaba long kawei na ka jingpynkheiñ ia ki kyndon ba la buh jong katei ka skulbah.
