Shillong, Ïaïong 26
Ka Rangdajied United FC ka la pynliem ïa ka Mawlai SC kaba dei lahduh jong ka aïom ba la dep da 2-1 kol na ka bynta ban ïai bteng ïa ka jingjop kaba hynriew ha ka Shillong Premier League 2023 ha ka Sngi Thohdieng.
Wat la ka Rangdajied kaba long ka lahduh jong ka Meghalaya State League 2023, ka la hap ban ïalehkai sa tang shiphew ngut ki rangïalehkai hadien ki 20 minit, hynrei kam shym la ailad ban shah rem ha ka Mawlai.
Lyngba kane ka nam jop ka Rangdajied ka la kamai 18 point na ka bynta ban ïai bat ïa ka kyrdan ba hakhlieh bad ka la tam haduh 5 point ïa ka Mawlai, kaba la don ha ka kyrdan ba-ar bad kamai 13 point na ki hynriew sien ïakhun.
Wat la ka Rangdajied bad ka Mawlai ki la thikna ban jam sha ka semi final, hynrei ym pat lah ban pynthikna ïano kin ïakynduh pyrshah.
Ïa kitei ki kol jong ka RUFC la thep da u Aenam Jyrwa (37) bad u Basuk Bina (63) shwa ban u Arlangky Nongsiej un shah sei da ka red card hadien ba u la pynphai ktien ïa u rephri. Wat la ka Mawlai ka la ïakhun dohïap ban ïoh thep kol, hynrei kam shym la lah ban pynurlong. Dei tad haduh shwa ban wai ba ka la lah ban pynphai kylla shi kol lyngba u Arkibor Makhroh (90+2) shwa ban kan mad ïa ka jingshah rem kaba nyngkong ha kane ka lympung.
U Kerichard L. Marshillong uba la mih ha ka jaka u rangapkol ka Rangdajied u Banshanskhem Kharsyntiew, u la lah ban pynpaw ïa ka jingtbit ha kaba u la lah ban pyllait na ka jingshah thep lyngba ka penalty ba la shut da u kapten ka Mawlai u Brolington Warlarpih.
Kham ha shwa, katei ka lahduh jong ka aïom ba la dep ka la ïoh ïa ki kabu kiba biang, hynrei kam shym la lah na ka daw ka jingïashan tyngeh u Kerichard bad ka Rangdajied ka la ïoh ïa ar tylli ki kabu ksiar, hynrei kam shym la lah ban thep.
Hynrei dei hadien shiteng kynta ba u Aenam u la ïoh ban pynkhih jar nyngkong ha ka minit kaba 38 bad kane ka la wan lyngba ka jingïarap pynbuh da u kapten ka RUFC u Apborlang Kurbah. Haduh kaba kut jong ka kylla miet ka Mawlai kam shym la lah ban pynphai bad ka RUFC ka dangtam da 1-0 kol.
Ka Rangdajied ka la pynbud biang ïa ka kol kaba ar hadien shi kynta lyngba u Basuk, uba la pynlehnohei kham hashwa. Une u rangïalehkai u la ïoh ban thep ha ka minit kaba 81 bad uba u rangapkol ka Mawlai u Siwel Rymbai um shym la lah ban khanglad na ka jingshah thep.
Hadien kine ki ar kol ka Rangdajied ka la hap ban ïalehkai sa tang shiphew ngut ki rangïalehkai hadien ba u Arlangky u la shah beh na madan hadien ba u la pynpaw ïa ka jingbym iahap halor ka jingai da ka free-kick ia ka Mawlai bad kane ka la buh jingeh ïa ka Rangdajied.
Hadien katto katne por ka Mawlai ka la ïoh da ka penalty ha ka minit kaba 86 hadien ba uwei na ki rangïalehkai ka RUFC u la pyndei da ka kti ia ka bol hapoh ‘box’, hynrei u Brolington u la pynlehnohei ïa kane ka kabu ksiar. Kane ka long ka sien kaba ar ïa utei u kapten un pynlehnohei ïa ka penalty.
Hashwa ban wai ka Mawlai ka la lah ban pynphai kylla shi kol lyngba u Arkibor bad ka la mad ïa ka jingshah rem.
Ka jingïalehkai ha ka sngi Saitjaiñ kan long hapdeng ka Sawmer SC pyrshah ïa ka Shillong Lajong FC ha ka por 3:15 janmiet.
