Bertina Lyngdoh
Ka jingtip bad ka jingpyrkhat ka ïai tyllun suki-pa-suki ha man u briew katba u nang heh u nang san. Ka jingstad pyrkhat kam shong eh tang ha kito kiba la biang ha ka kyrdan pule hynrei ka shong ruh ha kito ki bym da biang ha ka pule ka puthi lane ki bym ïoh lad satia ban pule. Ka stad pyrkhat ka wan ynda u lane ka, ki la sngewthuh bad tip bha ba u ei u khaw, kaei ka jingim bad kumno ban im. Mynba dang rit, ki don ki kmie ki kpa lane ki bahaïing bahasem ki ban pynnang pynstad ïangi ki ban pynpyrkhat na ka bynta jongngi ban shim ïa ki rai. Kano-kano ka lynti kaba ngi ïaid ka shong bad ka long lyngba ka stad pyrkhat kaba dei hi na ngi.
Kumta, baroh ngi nang ban pyrkhat hynrei kata ka jingstad pyrkhat ka ïapher na uwei-sha-uwei. Kumba briew u ïapher ha ka jinglah jong u haba ïadei bad ka pule puthi kumta ruh ha ka bor pyrkhat. Teng-teng ha ka jinglong briew, ngi sngew ba ngi sngew ba ngi la stad bha ha ka rukom pyrkhat pyrdaiñ, katba ngim tip pat ba ngi dang lait sharud khamtam haba ïa dei bad ki kam bahryndang. Lada kum kine ki jia, ka pyni keiñ ba haba ngi la stad ha ka pyrkhat ka pyrdaiñ, ngi leh pat kum kito lehse kiba duna ha ka bor pyrkhat. Don ki khep ba ngi kwah eh ban pyrkhat eh ïa kaba bha, pynban ha kajuh pat ka por, ngi syier bad tieng ïoh bym long pat kaba bha da kumne ngi kut noh ha ka jingbym shim por biang sa shisien ban pyrkhat. Kum ki kmie ki kpa shisien ba ngi la ailad ïa ki khun ban pyrkhat dalade hi, ki la tip ba ki khun jong ki, ki la rangbah bad nang hi ban pyrkhat kata ka mut ba ki la ïar ha ka stad pyrkhat. Kum ka nuksa, ki nongthoh kot ruh ki shim ïa ka lad ban pynpaw ïa ka jingpyrkhat jong ki lyngba ka thoh ka tar, namar ba ki sngew ba da kaba leh kumne, kan pynïar ïa ka jingmut jingpyrkhat u briew, bad ba un da pyrkhat bha ruh na ki jingthoh kiba u pule. Te namar kane, nyng-kong eh ka stad pyrkhat ka dei lyngba ki kmie ki kpa, kaba ar, dei ka jingshemphang jong u hi bad kaba lai pat dei na ki kot pule kiba pynlong ïa u ba un long uba stad ha ka pyrkhat ka pyrdaiñ.
Kumta, long kiba stad ha ka pyrkhat pyrdaiñ, ban long ka nuksa ba bha ïa kiwei. ïit ïa ka stad pyrkhat na kito kiba lah ban tei ïa ka ha ngi. Long barabor kiba pyrkhat bha bad kyrmen ïa kaba bha, wat lada ngim thikna.
Hikai ïalade ban shaniah ha la ka jingstad jingshemphang bad da kumta ngin long u nongpyntngen ïalade. Ka jingstad pyrkhat barabor ka ju wan rah hi ïa kaba bha. Keiñ ïa ka jingpyrkhat sniew namar katta nang pyrkhat sniew katta ruh ka nang pynduh mynsiem ïa ngi.
