Shillong, Ïaïong 28
Ka Royal Challengers Bengaluru (RCB) ka la khur ïa ka jingjop kaba lai ha ka lympung Indian Premier League (IPL) kaba dang ïaid shakhmat mynta. Kane ka jingjop ka la wan hadien ba ka la lah ban pynliem noh ïa ka Gujarat Titans da 9 wiket ha ka jingïalehkai kaba la long ha ka Sngi U Blei ha Ahmedabad.
Haba phai sha kane ka jingïa-lehkai, ka Bengaluru kaba la jop ïa ka jingkynting pisa (toss) ka la kam trai ban kawang bol nyngkong, hynrei ki nongkawang bol jong ka, kim shym la lah ban tehlakam ïa ki nongtied ka Gujarat Titans, ha kaba na ki 20 tylli ki over ki la lah ban ïoh 200 run bad hap 3 wiket.
Na ka liang ka Gujarat Titans, u Sai Sudharsan u la tied haduh 84 run na ki 49 tylli ki bol, u Shahrukh Khan u la tied 58 run na ki 30 tylli ki bol bad u David Miller u la tied 26 run na ki 19 tylli ki bol bad u Shubman Gill u la tied 16 run na ki 19 tylli ki bol. Katba na ka liang ka Bengaluru, u Swapnil Singh u la khur 1 wiket bad ai 23 run na ki 3 tylli ki over, u Glenn Maxwell u la khur 1 wiket bad ai 28 run na ki 3 ovet bad u Mohammed Siraj u la khur shi wiket.
Haba beh ïa kane ka thong, ka RCB ka la ban kot da kaba suk bad ha kaba ka la duh noh tang ïa ka wiket jong u Faf du Plessis uba la tied 24 run na ki 12 tylli ki bol, ïa kaba la khur da u Sai Kishore ka Gujarat. U Virat Kohli uba la tied 70 run na ki 44 tylli ki bol bad u Will Jacks marwei uba la tied haduh 100 run na ki 41 tylli ki bol, ka la pynlong ïa ka RCB ba kan lah ban poi sha katei ka thong tang ha ka over kaba 16.
Lyngba kane ka jingjop, ka Royal Challenger Bengaluru ka la kamai 2 point hynrei ka dang neh hi pat ha ka kyrdan kaba shiphew watla ka la kamai 6 point na ki 3 tylli ki jingjop bad mad 7 tylli ki jingshah rem haduh mynta. Katba ka Gujarat Titans pat ka dang neh ha ka kyrdan kaba 7 na ki 8 point ba ka la ïoh ban kamai haduh mynta na ki 10 tylli ki jingïalehkai.
